மற்றவர்களுக்காக ஜெபிப்பது எப்படி ?

கிறிஸ்தவ விசுவாசத்தின் ஆகச்சிறந்த முன்மாதிரிகளாக விளங்குபவர்கள் நம்முடைய ஆண்டவராகிய இயேசு கிறிஸ்துவும், அவருடைய அடிச்சுவடுகளைப் பின்பற்றி வாழ்ந்த அப்போஸ்தலர்களும் ஆவர். இன்று பலர் ஆண்டவரை அறியாத மக்களுக்காக எப்படி ஜெபிப்பது என்ற தவிப்போடு இருக்கிறார்கள். ஆனால், திருவிலக்கியத்தின் (பைபிள்) பக்கங்களைப் புரட்டிப் பார்க்கும்போது, இயேசுவும் அப்போஸ்தலர்களும் தங்களைச் சுற்றியிருந்த தேவனை அறியாத புறஜாதிகளுக்காகவும், தங்களைத் துன்புறுத்திய எதிரிகளுக்காகவும் மிக உன்னதமான முறைகளில் ஜெபித்து நமக்கு முன்மாதிரி வைத்துச் சென்றுள்ளனர்.

அவர்கள் ஒருபோதும் ஆண்டவரை அறியாத மக்களை வெறுக்கவோ அல்லது அவர்களைக் குற்றப்படுத்தவோ இல்லை. மாறாக, சாத்தானால் குருடாக்கப்பட்டிருந்த மக்களின் அறியாமை நீங்க வேண்டும் என்றும், அவர்களின் பாவங்கள் மன்னிக்கப்பட்டு அவர்கள் இரட்சிப்பின் சுவிசேஷ சத்தியத்தைக் கண்டடைய வேண்டும் என்றும் மிகுந்த பாரத்தோடு கண்ணீர் சிந்தி ஜெபித்தார்கள். சிலுவையில் தொங்கியபடியே இயேசு செய்த ஜெபமும், கல்லெறியப்பட்டு மரிக்கும் தருவாயிலும் ஸ்தேவான் செய்த ஜெபமும், தேசங்களின் இரட்சிப்பிற்காக பவுல் அப்போஸ்தலன் கண்ணீரோடு ஏறெடுத்த விண்ணப்பங்களும் இதற்கு மிகச்சிறந்த சான்றுகளாகும்.

எனவே, இயேசு கிறிஸ்துவும் அப்போஸ்தலர்களும் ஆண்டவரை அறியாத மக்களுக்காக எவ்வாறு தங்களின் ஆத்தும பாரத்தை ஜெபமாக வெளிப்படுத்தினார்கள் என்பதைப் பின்வரும் வேதாகமச் சம்பவங்கள் மற்றும் திருவசன ஆதாரங்களின் அடிப்படையில் விரிவாகக் காண்போம்.

1). இயேசு கிறிஸ்து செய்த மாதிரிகள்

அறியாமையில் உள்ளவர்களுக்காக மன்னிப்பின் ஜெபம்:

இயேசுவை சிலுவையில் அறைந்த ரோம போர்ச்சேவகர்களும், யூதர்களும் தாங்கள் செய்வது என்னவென்று அறியாத (ஆண்டவரை அறியாத) நிலையில் இருந்தார்கள். அவர்களுக்காக இயேசு சிலுவையில் தொங்கியபடியே பிதாவிடம் பரிந்து பேசினார்.

லூக்கா 23:34 – "அப்பொழுது இயேசு: பிதாவே, இவர்களுக்கு மன்னியும், தாங்கள் செய்கிறது இன்னதென்று அறியாதிருக்கிறார்களே என்றார்."

(விளக்கம்: அவர்கள் செய்த பாவத்தைக் குறித்து உணர்வடைந்து இரட்சிக்கப்பட வேண்டும் என்பதற்காகவே இந்த மன்னிப்பின் ஜெபத்தை இயேசு ஏறெடுத்தார்). 

உலகத்தார் விசுவாசிக்க வேண்டும் என்று செய்த ஜெபம்:

இயேசு தம்முடைய சீஷர்களுக்காக மட்டும் ஜெபிக்காமல், அவர்கள் மூலமாக உலகத்தில் உள்ள (ஆண்டவரை அறியாத) மக்கள் தன்னை விசுவாசிக்க வேண்டும் என்று ஜெபித்தார்.

யோவான் 17:20,21 – 

"நான் இவர்களுக்காகமட்டும் வேண்டிக்கொள்ளுகிறதில்லை, இவர்களுடைய வார்த்தையினாலே என்னை விசுவாசிக்கிறவர்களுக்காகவும் வேண்டிக்கொள்ளுகிறேன். ... நீர் என்னை அனுப்பினதை உலகமானது விசுவாசிக்கிறதற்காக..." 

2). அப்போஸ்தலர்கள் செய்த மாதிரிகள்

ஸ்தேவானின் மரண கால ஜெபம்:

ஆண்டவரை அறியாமல், கிறிஸ்துவின் சுவிசேஷத்தை எதிர்த்து, தன்னைத் கல்லெறிந்து கொன்ற யூத மக்களுக்காக அப்போஸ்தல நடபடிகள் புஸ்தகத்தில் ஸ்தேவான் முழங்கால் படியிட்டு ஜெபித்தார்.

அப்போஸ்தலர் 7:60 – "அவன் முழங்கால்படியிட்டு: ஆண்டவரே, இவர்கள்மேல் இந்தப் பாவத்தைச் சுமத்தாதிரும் என்று மிகுந்த சத்தமிட்டுச் சொன்னான்."

(விளக்கம்: ஸ்தேவான் செய்த இந்த ஜெபத்தின் விளைவாகத்தான், அங்கிருந்த சவுல் என்ற வாலிபன் பின்பு பவுல் அப்போஸ்தலனாக மாறி லட்சக்கணக்கான மக்களுக்கு இரட்சிப்பைக் கொண்டு சேர்த்தான்). 

பவுல் அப்போஸ்தலனின் இருதயத்தின் பார ஜெபம்:

அப்போஸ்தலனாகிய பவுல், இயேசுவை மெய்யான மெசியாவாக ஏற்றுக்கொள்ளாத (ஆண்டவரை அறியாத நிலையில் இருந்த) தன் சொந்த இஸ்ரவேல் மக்களுக்காக தேவனிடம் அழுது ஜெபித்தார்.

ரோமர் 10:1 – "சகோதரரே, இஸ்ரவேலர் இரட்சிக்கப்பட வேண்டும் என்பதே என் இருதயத்தின் விருப்பமும் நான் தேவனை நோக்கிச் செய்யும் ஜெபமுமாயிருக்கிறது."

உலக அரசர்கள் மற்றும் அதிகாரிகளுக்காக ஜெபிக்கக் கட்டளை:

அப்போஸ்தலர்கள் வாழ்ந்த காலத்தில் இருந்த ராஜாக்களும், அதிகாரிகளும் இயேசுவை அறியாத புறஜாதிகளாகவும், சபையைத் துன்புறுத்துபவர்களாகவும் இருந்தார்கள். அவர்கள் இரட்சிக்கப்பட வேண்டும் என்று பவுல் சபைகளுக்கு எழுதினார்.1 தீமோத்தேயு 2:1-4 – "நான் பிரதானமாய் எச்சரிக்கிறதென்னவெனில்... எல்லா மனுஷருக்காகவும், ராஜாக்களுக்காகவும், அதிகாரமுள்ள யாவருக்காகவும், விண்ணப்பங்களையும் ஜெபங்களையும்... பண்ணவேண்டும். எல்லா மனிதரும் இரட்சிக்கப்படவும், சத்தியத்தை அறிகிற அறிவை அடையவும், தேவன் விருப்பமுள்ளவராயிருக்கிறார்." 

முக்கிய ஆவிக்குரிய உண்மை:

இயேசுவும் அப்போஸ்தலர்களும் ஆண்டவரை அறியாத மக்களுக்காக ஜெபித்தபோது, "அவர்களுடைய அறியாமை நீங்க வேண்டும், அவர்கள் செய்த பாவங்கள் மன்னிக்கப்பட வேண்டும், அவர்கள் சுவிசேஷ சத்தியத்தை அறிய வேண்டும்" என்றே ஜெபித்தார்கள். அந்த ஜெபத்தின் தொடர்ச்சியாக அவர்கள் நடுவில் சுவிசேஷத்தையும் நேரிடையாகப் பிரசங்கித்தார்கள்.

முழங்கால் படியிட்டு ஜெபி

எழுந்து நின்று சுவிசேஷத்தை பிரசங்கி 

கர்த்தர் உங்களை ஆசீர்வதிப்பாராக ஆமென். 

கிறிஸ்துவின் பணியில் சகோதரன் சிலுவை ராஜா 

9841711591