இயேசுவே நமது வாக்குத்தத்தம்.

புனித வேதாகமம் என்பது வெறும் வரலாற்றுப் புத்தகமோ அல்லது தார்மீகக் கதைகளின் தொகுப்போ அல்ல; அது மனிதகுல மீட்பிற்காக ஆதிமுதற்கொண்டு தேவன் திட்டமிட்டுச் செயல்படுத்திய உடன்படிக்கைகளின் ஆவணம் ஆகும். வேதாகமத்தின் பழைய ஏற்பாடு முழுவதும் தேவனுடைய வாக்குத்தத்தங்களால் நிறைந்துள்ளது. ஆதாம் ஏவாள் ஏதேன் தோட்டத்தில் பாவம் செய்த அந்தத் தருணத்திலேயே, "ஸ்திரீயின் வித்து சர்ப்பத்தின் தலையை நசுக்கும்" (ஆதியாகமம் 3:15) என்ற முதல் மீட்பின் வாக்குத்தத்தத்தை தேவன் மனிதனுக்கு அருளினார்.
பழைய ஏற்பாட்டின் காலம் என்பது வாக்குப்பண்ணப்பட்ட அந்த இரட்சகரின் வருகைக்காக ஒட்டுமொத்த மனிதகுலமும் ஆவலோடு காத்திருந்த ஒரு எதிர்பார்ப்பின் காலம் ஆகும். ஆபிரகாமுக்குக் கொடுக்கப்பட்ட ஆசீர்வாதம், தாவீதுக்கு அளிக்கப்பட்ட சிங்காசன வாக்குத்தத்தம், மற்றும் ஏசாயா, மீகா போன்ற தீர்க்கதரிசிகள் மூலம் உரைக்கப்பட்ட தீர்க்கதரிசனங்கள் என அனைத்தும் ஒரு குறிப்பிட்ட இலக்கை நோக்கியே சுட்டிக்காட்டின.
புதிய ஏற்பாட்டிற்குள் நாம் நுழையும்போது, அந்த ஆயிரக்கணக்கான ஆண்டுகால எதிர்பார்ப்பு இயேசு கிறிஸ்து என்னும் ஒரே நபரில் வந்து நிறைவடைகிறது. அப்போஸ்தலனாகிய பவுல் கொரிந்தியருக்கு எழுதும்போது, "தேவனுடைய வாக்குத்தத்தங்களெல்லாம் இயேசு கிறிஸ்துவுக்குள் ஆம் என்றும், அவருக்குள் ஆமென் என்றும் இருக்கிறதே" (2 கொரிந்தியர் 1:20) என்று பிரகடனப்படுத்துகிறார். அதாவது, கடவுள் மனிதனுக்குக் கொடுத்த, கொடுக்கப்போகிற எல்லா நன்மைகளும், ஆசீர்வாதங்களும், நித்திய ஜீவனும் இயேசு கிறிஸ்து என்ற பிரதான வாக்குத்தத்தத்தின் மூலமாகவே நமக்குக் கிடைக்கிறது.
சுருக்கமாகக் கூறின், பழைய ஏற்பாடு என்பது கிறிஸ்துவைப்பற்றிய 'வாக்குத்தத்தம்'; புதிய ஏற்பாடு என்பது கிறிஸ்துவில் அது 'நிறைவேறுதல்'. நிழலாக இருந்த பழைய ஏற்பாட்டு தீர்க்கதரிசனங்கள் அனைத்தும், நிஜமாகிய இயேசு கிறிஸ்துவில் எப்படி ஆச்சரியமான முறையில் நிறைவேறியது என்பதை வேதாகம வசனங்களின் ஆதாரத்தோடு இப்பகுதியில் விரிவாகக் காண்போம்.

📜 பிரதான அடிப்படை வசனம்
"தேவனுடைய வாக்குத்தத்தங்களெல்லாம் இயேசு கிறிஸ்துவுக்குள் ஆம் என்றும், அவருக்குள் ஆமென் என்றும் இருக்கிறதே."
— [2 கொரிந் 1:20]

1. கன்னியின் வயிற்றில் பிறப்பார்
பழைய ஏற்பாட்டில் மெசியா ஒரு கன்னியின் வயிற்றில் பிறப்பார் என்று முன்னறிவிக்கப்பட்டது. அது புதிய ஏற்பாட்டில் அப்படியே நிறைவேறியது.

பழைய ஏற்பாட்டு வாக்குத்தத்தம்: "இதோ, ஒரு கன்னிகை கர்ப்பவதியாகி ஒரு குமாரனைப் பெறுவாள், அவருக்கு இம்மானுவேல் என்று பேரிடுவாள்." — [ஏசாயா 7:14]

புதிய ஏற்பாட்டு நிறைவேற்றம்: "இதோ, ஒரு கன்னிகை கர்ப்பவதியாகி ஒரு குமாரனைப் பெறுவாள்... என்று தீர்க்கதரிசியின் மூலமாய்க் கர்த்தரால் உரைக்கப்பட்டது நிறைவேறும்படி இதெல்லாம் நடந்தது." — [மத்தேயு 1:22,23]

2. பெத்லகேம் ஊரில் பிறப்பார்
யூதேயாவில் உள்ள பெத்லகேம் நகரில் இரட்சகர் பிறப்பார் என்ற தீர்க்கதரிசனம் துல்லியமாக நிறைவேறியது.

பழைய ஏற்பாட்டு வாக்குத்தத்தம்: "யூதேயாவிலுள்ள பெத்லகேமே... உன்னிடத்திலிருந்து இஸ்ரவேலை ஆளப்போகிறவர் புறப்பட்டு எனக்குள் வருவார்." — [மீகா 5:2]

புதிய ஏற்பாட்டு நிறைவேற்றம்: "ஏரோது ராஜாவின் நாட்களிலே யூதேயாவிலுள்ள பெத்லகேமிலே இயேசு பிறந்தபோது..." — [மத்தேயு 2:1]

3. ஆபிரகாம் மற்றும் தாவீதின் வம்சம்
உலக மக்கள் யாவரும் ஆபிரகாமின் சந்ததி மூலமும், தாவீதின் சிங்காசனத்தின் மூலமும் ஆசீர்வதிக்கப்படுவார்கள் என்ற வாக்குத்தத்தம் கிறிஸ்துவில் நிறைவேறியது.
பழைய ஏற்பாட்டு வாக்குத்தத்தம்:
"உன் சந்ததிக்குள் பூமியிலுள்ள வம்சங்களெல்லாம் ஆசீர்வதிக்கப்படும்." — [ஆதியாகமம் 22:18] / "உன் சிங்காசனத்தை என்றென்றைக்கும் நிலைப்படுத்துவேன்." — [சங்கீதம் 89:4]

புதிய ஏற்பாட்டு நிறைவேற்றம்: "ஆபிரகாமின் குமாரனாகிய தாவீதின் குமாரனான இயேசு கிறிஸ்துவினுடைய வம்ச வரலாறு." — [மத்தேயு 1:1] /
"அந்தச் சந்ததி கிறிஸ்துவே." — [கலாத்தியர் 3:16]

4. நம்முடைய பாவங்களுக்காகப் பலியாவார்
மனிதர்களின் அக்கிரமங்களுக்காகவும் பாவங்களுக்காகவும் மெசியா நொறுக்கப்படுவார் என்ற ஏசாயாவின் தீர்க்கதரிசனம் சிலுவையில் நிறைவேறியது.

பழைய ஏற்பாட்டு வாக்குத்தத்தம்: "நம்முடைய மீறுதல்களினிமித்தம் அவர் காயப்பட்டு, நம்முடைய அக்கிரமங்களினிமித்தம் அவர் நொறுக்கப்பட்டார்." — [ஏசாயா 53:5]

புதிய ஏற்பாட்டு நிறைவேற்றம்: "அவரே நம்முடைய பாவங்களை நிவர்த்தி செய்கிற கிருபாதார பலியாயிருக்கிறார்." — [1 யோவான் 2:2] / [1 பேதுரு 2:24]

5. மரணத்தை வென்று உயிர்த்தெழுவார்
மெசியாவின் ஆத்துமா பாதாளத்தில் விடப்படுவதில்லை என்றும், அவர் உயிர்த்தெழுவார் என்றும் சங்கீதக்காரன் எழுதினார்.

பழைய ஏற்பாட்டு வாக்குத்தத்தம்:
"என் ஆத்துமாவைப் பாதாளத்தில் விடமாட்டீர்; உம்முடைய பரிசுத்தவான் அழிவைக் காணவொட்டீர்." — [சங்கீதம் 16:10]

புதிய ஏற்பாட்டு நிறைவேற்றம்: "கிறிஸ்துவானவர் தீர்க்கதரிசனங்களின்படி... மூன்றாம் நாளில் உயிர்த்தெழுந்தார்." — [1 கொரி 15:3,4; அப் 2:31]

6. புதிய உடன்படிக்கையின் நாயகன்
கற்களில் எழுதப்பட்ட நியாயப்பிரமாணத்திற்குப் பதிலாக, மனித இதயங்களில் எழுதப்படும் ஒரு புதிய உடன்படிக்கையை தேவன் வாக்குப்பண்ணினார்.

பழைய ஏற்பாட்டு வாக்குத்தத்தம்: "இதோ, நான் இஸ்ரவேல் குடும்பத்தோடும்... ஒரு புதிய உடன்படிக்கையைப்
பண்ணும் நாட்கள் வரும்." — [எரேமியா 31:31]

புதிய ஏற்பாட்டு நிறைவேற்றம்: "இந்தப் பாத்திரம் உங்களுக்காகச் சிந்தப்படுகிற என்னுடைய இரத்தத்தினாலாகும் புதிய உடன்படிக்கையாயிருக்கிறது என்றார்." — [லூக் 22:20; எபி 8:6]

💡 சுருக்கம்
ஆதியாகமம் முதல் மல்கியா வரை உரைக்கப்பட்ட 300-க்கும் மேற்பட்ட தீர்க்கதரிசனங்களும் வாக்குத்தத்தங்களும் இயேசு கிறிஸ்து ஒருவரில் மட்டுமே நிறைவேறியுள்ளன. எனவே, நாம் தேட வேண்டிய உடன்படிக்கையும், நமக்குக் கொடுக்கப்பட்ட நித்திய ஜீவன் என்ற உன்னத வாக்குத்தத்தமும் இயேசு கிறிஸ்து மட்டுமே என்பது வேதாகம ரீதியாகத் தெளிவாகிறது
(1யோவான் 5:11).

தொடர்ந்து நாம் தியானம் செய்வோம் கர்த்தர் உங்களை ஆசீர்வதிப்பாராக ஆமென்.
கிறிஸ்துவின் பணிகள் சகோதரன் சிலுவை ராஜா
9841711591.