அழைத்தவர் போல

நீங்கள் என்னைத் தெரிந்துகொள்ளவில்லை, "நான் உங்களைத் தெரிந்துகொண்டேன்;" நீங்கள் என் நாமத்தினாலே பிதாவைக் கேட்டுகொள்ளுவது எதுவோ, அதை அவர் உங்களுக்குக் கொடுக்கத்தக்கதாக நீங்கள் போய்க் கனிகொடுக்கும்படிக்கும், உங்கள் கனி நிலைத்திருக்கும்படிக்கும், நான் உங்களை ஏற்படுத்தினேன்.

(யோவான் 15:16)

தேவன் பரிசுத்தராய் இருப்பது போல, அவராலும் அவரது ஊழியத்தாலும் தெரிந்துகொள்ளப்பட்ட நாமும் பரிசுத்தமாய் வாழ வேண்டும் என்பது வேதாகமத்தின் முதன்மையான கட்டளையாகும். 

1} "நம்மைத் தெரிந்துகொண்ட தேவன் பரிசுத்தராய் இருப்பது போல" :

(லேவி 19:2; 20:26;)

1. அழைத்தவர் பரிசுத்தர் என்பதால் நாமும் பரிசுத்தராய் இருக்க வேண்டும்

நம்மைத் தெரிந்துகொண்டு அழைத்த தேவன் தூய்மையானவர். எனவே, அவரைப் பின்பற்றும் நாமும் நம்முடைய அன்றாட வாழ்க்கையின் எல்லாப் பகுதிகளிலும் பரிசுத்தத்தைக் கடைப்பிடிக்க வேண்டும்.

வசன ஆதாரம்: "உங்களை அழைத்தவர் பரிசுத்தராயிருக்கிறதுபோல, நீங்களும் உங்கள் நடைகளெல்லாவற்றிலேயும் பரிசுத்தராயிருங்கள்." — 1 பேதுரு 1:15 

2. தேவன் பரிசுத்தராய் இருப்பதால் நாமும் பரிசுத்தராய் இருக்க வேண்டும்

பரிசுத்தம் என்பது தேவனுடைய மிக முக்கியமான குணமாகும். நாம் அவருடைய பிள்ளைகளாகவும் ஊழியர்களாகவும் இருப்பதால், அவருடைய குணத்தை நாமும் பிரதிபலிக்க வேண்டும்.

வசன ஆதாரம்: 

"நான் பரிசுத்தர், ஆகையால் நீங்களும் பரிசுத்தராயிருங்கள் என்று எழுதியிருக்கிறதே." 

— 1 பேதுரு 1:16; லேவி 11:44) 

3.உலகத்தோற்றத்திற்கு முன்பே பரிசுத்தமுள்ளவர்களாக இருக்கவே நம்மைத் தெரிந்துகொண்டார்

தேவன் நம்மைத் தமக்கென்று உலகத் தோற்றத்திற்கு முன்பாகவே தேர்ந்தெடுத்ததன் முதன்மை நோக்கமே, நாம் அவருக்கு முன்பாக அன்பில் பரிசுத்தமும் குற்றமில்லாதவர்களுமாய் வாழ வேண்டும் என்பதற்காகத்தான்.

வசன ஆதாரம்: "தமக்கு முன்பாக நாம் அன்பில் பரிசுத்தமுள்ளவர்களும் குற்றமில்லாதவர்களுமாயிருப்பதற்கு, அவர் உலகத்தோற்றத்துக்கு முன்னே கிறிஸ்துவுக்குள் நம்மைத் தெரிந்துகொண்டார்." — எபேசியர் 1:4

4. பரிசுத்தமில்லாமல் தேவனைத் தரிசிக்க முடியாது 

ஒருவர் எவ்வளவு பெரிய ஊழியங்களைச் செய்தாலும், அவருடைய தனிப்பட்ட வாழ்க்கையில் பரிசுத்தம் இல்லை என்றால், அவர் தேவனுடைய பிரசன்னத்தைக் காணவோ, அவரோடு நித்தியத்தில் வாழவோ முடியாது.

வசன ஆதாரம்: "யாவரோடும் சமாதானமாயிருக்கவும், பரிசுத்தமுள்ளவர்களாயிருக்கவும் நாடுங்கள்; பரிசுத்தமில்லாமல் ஒருவனும் கர்த்தரைத் தரிசிப்பதில்லையே." — எபிரெயர் 12:14

5. தேவன் நம்மை அசுத்தத்திற்கல்ல, பரிசுத்தத்திற்கே அழைத்திருக்கிறார் 

தேவனுடைய அழைப்பு என்பது உலக ஆசைகளுக்கோ அல்லது அசுத்தமான காரியங்களில் ஈடுபடுவதற்கோ அல்ல. மாறாக, நம்முடைய சிந்தனை, சொல், செயல் அனைத்திலும் பிரித்தெடுக்கப்பட்ட பரிசுத்த வாழ்க்கையை வாழ்வதற்கே ஆகும்.

வசன ஆதாரம்: "தேவன் நம்மை அசுத்தத்திற்கு அல்ல, பரிசுத்தத்திற்கே அழைத்திருக்கிறார்." — 1 தெசலோ 4:7 

6. நம்முடைய சரீரம் பரிசுத்த ஆவியானவர் தங்கும் ஆலயம் 

நம்மைத் தெரிந்துகொண்ட தேவன் நம் சரீரத்தைத் தமது தங்குமிடமாக மாற்றியுள்ளார். எனவே, நம்முடைய சரீரத்தை அசுத்தங்களுக்கு விலக்கிக் காத்து, பரிசுத்தமாய் வைப்பது நமது கடமையாகும்.

வசன ஆதாரம்: "உங்கள் சரீரமானது நீங்கள் தேவனாலே பெற்றும் உங்களில் தங்கியும் இருக்கிற பரிசுத்தஆவியினுடைய ஆலயமாயிருக்கிறதென்றும், நீங்கள் உங்களுடையவர்களல்லவென்றும் அறியீர்களா?" 

— 1 கொரிந் 6:19 

7. ஆவி, ஆத்துமா, சரீரம் முழுவதும் குற்றமற்றுப் பாதுகாக்கப்பட வேண்டும் 

தேவனுடைய பரிசுத்தம் நம்முடைய ஆவி, ஆத்துமா, சரீரம் ஆகிய மூன்று பகுதிகளையும் முழுமையாகப் பரிசுத்தமாக்க வேண்டும். இயேசு கிறிஸ்து மறுபடியும் வரும்போது நாம் முற்றிலும் குற்றமற்றவர்களாகக் காணப்பட வேண்டும். 

வசன ஆதாரம்: "சமாதானத்தின் தேவன் தாமே உங்களை முற்றிலும் பரிசுத்தமாக்குவாராக; உங்கள் ஆவி, ஆத்துமா, சரீரம் முழுவதும், நம்முடைய கர்த்தராகிய இயேசு கிறிஸ்து வரும்போது குற்றமற்றதாய்க் காக்கப்படுவதாக." 

 (1 தெசலோ 5:23)

2} "தேவன் அழைத்த அழைப்புக்கேற்ற வாழ்க்கை:"

தேவன் நம்மைத் தெரிந்துகொண்டு அழைத்த அழைப்பிற்குப் பாத்திரமாய் வாழ்வது ஒவ்வொரு விசுவாசியினுடையவும், ஊழியரினுடையவும் கடமையாகும். 

1. தாழ்மை மற்றும் சாந்தமுள்ள வாழ்க்கை

அழைப்பிற்குப் பாத்திரமாய் வாழ்வதன் முதல் அடையாளம் பெருமையற்ற, தாழ்மையான மனநிலையாகும். மற்றவர்களிடம் நீடிய சாந்தத்தோடும், அன்போடும் சகிப்புத்தன்மையைக் காட்ட வேண்டும்.

வசன ஆதாரம்: "நீங்கள் அழைக்கப்பட்ட அழைப்புக்கு யோக்கியமாய் நடந்து, மிகுந்த மனத்தாழ்மையும் சாந்தமும் நீடிய பொறுமையும் உடையவர்களாய், அன்பினால் ஒருவரையொருவர் தாங்கி..." 

— எபேசியர் 4:1-2

2. ஒளியின் பிள்ளைகளாய் நடக்கும் வாழ்க்கை

நாம் ஒரு காலத்தில் இருளில் இருந்தோம், ஆனால் தேவன் நம்மைத் தமது ஆச்சரியமான ஒளியினிடத்திற்கு அழைத்துள்ளார். எனவே, நற்கிரியைகள் மற்றும் உண்மையுள்ள ஒளியின் பிள்ளைகளாய் வாழ வேண்டும்.

வசன ஆதாரம்: "நீங்களோ, உங்களை அந்தகாரத்தினின்று தம்முடைய ஆச்சரியமான ஒளியினிடத்திற்கு வரவழைத்தவருடைய புண்ணியங்களை அறிவிக்கும்படியாகத் தெரிந்துகொள்ளப்பட்ட சந்ததியாயும்... இருக்கிறீர்கள்."

 — 1 பேதுரு 2:9

3. சமாதானத்தைத் தேடும் வாழ்க்கை

கிறிஸ்துவின் சரீரமாகிய சபையிலும், குடும்பத்திலும், சமூகத்திலும் நாம் சமாதானத்தைக் காத்துக்கொள்ளவும், ஒருமனமாய் வாழவும் அழைக்கப்பட்டிருக்கிறோம்.

வசன ஆதாரம்: "கிறிஸ்துவின் சமாதானம் உங்கள் இருதயங்களில் ஆளக்கடவது, இதற்கென்றே நீங்கள் ஒரே சரீரமாக அழைக்கப்பட்டீர்கள்; நன்றியறிதலுள்ளவர்களாயுமிருங்கள்." 

— கொலோ 3:15

4. மாம்சத்தின் இச்சைகளுக்கு விலகிய சுயாதீன வாழ்க்கை

தேவனுடைய அழைப்பு நமக்கு பாவத்திலிருந்து விடுதலையையும் சுயாதீனத்தையும் தருகிறது. ஆனால், அந்தச் சுயாதீனத்தைப் பாவத்திற்கான வாய்ப்பாகப் பயன்படுத்தாமல், அன்பினால் ஒருவருக்குப் பின் ஒருவர் ஊழியஞ்செய்ய வேண்டும்.

வசன ஆதாரம்: "சகோதரரே, நீங்கள் சுயாதீனத்திற்கு அழைக்கப்பட்டீர்கள்; இந்தச் சுயாதீனத்தை நீங்கள் மாம்சத்திற்கு ஏதுவாகப் பயன்படுத்தாமல், அன்பினால் ஒருவருக்கொருவர் ஊழியஞ்செய்யுங்கள்." — கலாத்தியர் 5:13

5. பரலோகக் குறிக்கோளை நோக்கிய வாழ்க்கை

இந்த உலக காரியங்களின் மேல் மாத்திரம் நோக்கமாக இராமல், தேவன் கிறிஸ்து இயேசுவுக்குள் நமக்குக் கட்டளையிட்ட உன்னதமான பரலோகப் பந்தயப்பொருளை (இலக்கை) நோக்கி ஓட வேண்டும்.

வசன ஆதாரம்: "கிறிஸ்து இயேசுவுக்குள் தேவன் அழைத்த பரம அழைப்பின் பந்தயப்பொருளுக்காக இலக்கை நோக்கித் தொடருகிறேன்." — பிலிப்பியர் 3:14

6. கர்த்தருக்குப் பிரியமாய் நடக்கும் வாழ்க்கை

நம்முடைய சொந்த இஷ்டப்படி வாழாமல், எல்லா நற்கிரியைகளுமாகிய கனிகளைத் தந்து, தேவனைப் பற்றிய அறிவில் விருத்தியடைந்து, அவருக்கு முற்றிலும் பிரியமாய் நடக்க வேண்டும்.

வசன ஆதாரம்: "நீங்கள் கர்த்தருக்குப் பாத்திரமாய் நடந்து, அவருக்குப் பிரியமான எல்லாவற்றையும் செய்யும்படியாகவும், சகலவித நற்கிரியைகளுமாகிய கனிகளைத் தந்து..." 

— கொலோ 1:10

7. அழைப்பையும் தெரிந்துகொள்ளலையும் உறுதிப்படுத்தும் வாழ்க்கை

நாம் தேவனுடைய அழைப்பில் பின்வாங்கிப் போகாமல் நிலைத்திருக்க வேண்டுமானால், விசுவாசம், கற்பு, அறிவு, இச்சை அடக்கம், பொறுமை மற்றும் தேவபக்தியை நம் வாழ்வில் அதிகமாக்கி, நம்முடைய அழைப்பை உறுதிப்படுத்த வேண்டும்.

வசன ஆதாரம்: "ஆகையால், சகோதரரே, உங்கள் அழைப்பையும் தெரிந்துகொள்ளலையும் உறுதிப்படுத்தும்படி ஜாக்கிரதையாயிருங்கள்; இவைகளைச் செய்தால் நீங்கள் ஒருக்காலும் இடறிவிழுவதில்லை." — 2 பேதுரு 1:10

3} அழைப்புக்கேற்ற நோக்கத்தை நிறைவேற்றி முடிக்க வேண்டும்.

1. தேவன் நியமித்த இலக்கை நோக்கி விசுவாசத்துடன் ஓட வேண்டும்

தேவன் நம் ஒவ்வொருவருக்கும் ஒரு குறிப்பிட்ட பந்தயப் பாதையையும் நோக்கத்தையும் வைத்துள்ளார். பின்விளைவுகளைப் பாராமல், சோர்ந்து போகாமல், அவசியமில்லாத பாரங்களை உதறித்தள்ளிவிட்டு, அந்த இலக்கை நோக்கி நாம் ஓட வேண்டும்.

வசன ஆதாரம்: "இயேசுவை நோக்கி, நமக்கு நியமித்திருக்கிற ஓட்டத்தில் பொறுமையோடே ஓடக்கடவோம்." (எபிரெயர் 12:1-2; மத் 28:19-20) 

2. நமக்குக் கொடுக்கப்பட்ட ஊழியத்தை முழுமையாக நிறைவேற்ற வேண்டும் 

தேவன் நமக்குக் கொடுத்த பொறுப்பு அல்லது ஊழியத்தை அரைகுறையாக விட்டுவிடக் கூடாது. தடைகள் வந்தாலும், விழிப்புடன் இருந்து அந்த நோக்கத்தை முழுமையாகச் செய்து முடிக்க வேண்டும்.

வசன ஆதாரம்: 

"நீயோ எல்லாவற்றிலும் தெளிந்த புத்தியுள்ளவனாயிரு, தீங்கனுபவி, சுவிசேஷகனுடைய வேலையைச் செய், உன் ஊழியத்தை நிறைவேற்று." 

— 2 தீமோத் 4:5 

3. அந்தகாரத்தில் உள்ளவர்களுக்கு ஒளியாக மாற வேண்டும்

நம்மை அழைத்ததன் முக்கிய நோக்கம், பாவ இருளில் தவிக்கும் மக்களுக்கு மீட்பின் ஒளியைக் கொண்டு சேர்ப்பதும், தேவனுடைய நற்குணங்களை உலகிற்கு வெளிப்படுத்துவதுமே ஆகும்.

வசன ஆதாரம்: "அந்தகாரத்தினின்று தம்முடைய ஆச்சரியமான ஒளியினிடத்திற்கு வரவழைத்தவருடைய புண்ணியங்களை அறிவிக்கும்படியாக..." — 1 பேதுரு 2:9

4. நற்கிரியைகளைச் செய்வதில் நிலைத்திருக்க வேண்டும் 

கிறிஸ்து இயேசுவுக்குள் நாம் சிருஷ்டிக்கப்பட்டதன் நோக்கமே, தேவன் நமக்கு முன்னதாக ஆயத்தம் பண்ணிய நற்கிரியைகளை நம்முடைய அன்றாட வாழ்க்கையில் செய்து முடிப்பதே ஆகும்.

வசன ஆதாரம்: "நற்கிரியைகளைச் செய்கிறதற்கு நாம் கிறிஸ்து இயேசுவுக்குள் சிருஷ்டிக்கப்பட்டு, தேவனுடைய செய்கையாயிருக்கிறோம்; அவைகளில் நாம் நடக்கும்படி அவர் முன்னதாக அவைகளை ஆயத்தம்பண்ணியிருக்கிறார்." 

— எபேசியர் 2:10 

5. நற்கனிகளைத் தந்து, அந்த கனி நிலைத்திருக்கச் செய்ய வேண்டும்

இயேசு நம்மைத் தெரிந்துகொண்டதன் நோக்கம், நாம் உலகிற்குச் சென்று ஆன்மீகக் கனிகளையும் நற்பண்புகளையும் தந்து, தேவனுடைய நாமத்திற்கு மகிமை சேர்க்க வேண்டும் என்பதே.

வசன ஆதாரம்: "நீங்கள் போய்க் கனிகளைத் தரும்படிக்கும், உங்கள் கனி நிலைத்திருக்கும்படிக்கும், நான் உங்களை ஏற்படுத்தினேன்." — யோவான் 15:16 

6. சுயநலமின்றி பிறருக்கு அன்புடனும் தாழ்மையுடனும் ஊழியஞ்செய்ய வேண்டும்

நம்முடைய அழைப்பின் நோக்கம் அதிகாரத்தைக் காட்டுவதல்ல, மாறாக இயேசுவைப் போல மற்றவர்களுக்கு அன்போடு சேவை செய்வதும், சமுதாயத்தில் சமாதானத்தை உருவாக்குவதுமே ஆகும்.

வசன ஆதாரம்: "இந்தச் சுயாதீனத்தை நீங்கள் மாம்சத்திற்கு ஏதுவாகப் பயன்படுத்தாமல், அன்பினால் ஒருவருக்கொருவர் ஊழியஞ்செய்யுங்கள்." — கலாத்தியர் 5:13

7. மரணபரியந்தம் உண்மையுள்ளவர்களாய் இருக்க வேண்டும்

அழைப்பின் நோக்கத்தை இறுதிவரை நிறைவேற்றுகிறவர்களுக்கே ஜீவகிரீடம் வாக்குத்தத்தம் பண்ணப்பட்டுள்ளது. எனவே, எந்தப் சூழ்நிலையிலும் பின்வாங்கிப் போகாமல் உண்மையோடு நிலைத்திருக்க வேண்டும்.

வசன ஆதாரம்: 

"நீ மரணபரியந்தம் உண்மையாயிரு, அப்பொழுது ஜீவகிரீடத்தை உனக்குத் தருவேன்." — வெளிப்படுத்தின விசேஷம் 2:10

கர்த்தர் உங்களை ஆசீர்வதிப்பாராக ஆமென். 

கிறிஸ்துவின் பணியில் சகோதரன் சிலுவை ராஜா. 

9841711591.