சிலுவை புனிதம் என்றால் வழிபடலாமா ?

கிறிஸ்தவ சமயத்தில் சிலுவை என்பது வெறும் மரத்தாலான ஒரு கருவி மட்டுமல்ல; அது மனிதகுல மீட்பின், தியாகத்தின் மற்றும் தெய்வீக அன்பின் மிக உயரிய புனித சின்னமாகும். இயேசு கிறிஸ்து மனிதர்களின் பாவங்களைப்போக்க தம் உயிரைத் தியாகம் செய்த இடமாக சிலுவை இருப்பதால், உலகெங்கிலும் உள்ள கோடிக்கணக்கான கிறிஸ்தவர்களால் அது போற்றப்படுகிறது.

இருப்பினும், "இந்த புனித சின்னத்தை வழிபடலாமா?" என்ற கேள்வி எழும்போது, விவிலியம் (பைபிள்) அதற்கு மிகத் தெளிவான வழிகாட்டுதல்களையும் எச்சரிக்கைகளையும் வழங்குகிறது. விவிலியத்தின்படி, ஒரு சின்னத்தை மதிப்பதற்கும், அதையே கடவுளாக உருவகப்படுத்தி வழிபடுவதற்கும் இடையே மிகப்பெரிய வேறுபாடு உள்ளது.

கடவுள் மட்டுமே வழிபாட்டிற்குரியவர் என்ற விவிலியக் கோட்பாட்டின் அடிப்படையிலும், உருவ வழிபாட்டைப் பற்றி மறைநூல் எச்சரிக்கும் வசனங்களின் பின்னணியிலும், சிலுவை வழிபாட்டைப் பற்றிய விவிலிய ஆதாரங்களை விரிவாகக் காண்பதே இக்கட்டுரையின் நோக்கமாகும்.

1. உருவ வழிபாடு மற்றும் பொருட்கள் வழிபாட்டிற்கு தடை

விவிலியம் எந்தவொரு பொருளையும், உருவத்தையும் கடவுளாக நினைத்தோ அல்லது கடவுளுக்கு நிகராகவோ வழிபடுவதைக் கடுமையாக விலக்குகிறது.

விடுதலைப் பயணம் (யாத்திராகமம்) 20:4-5 – "மேலே விண்ணில் உள்ளவை, கீழே மண்ணில் உள்ளவை, மண்ணின்கீழ் நீரில் உள்ளவை எவற்றின் வடிவிலும் உனக்குச் சிலை செய்யாதே. நீ அவற்றை வழிபடவோ அவற்றுக்குப் பணிந்து நடக்கவோ வேண்டாம்."

லேவியர் 26:1 – "நீங்கள் உங்களுக்கென்று சிலைகளையோ செதுக்கிய உருவங்களையோ செய்யலாகாது; நினைவுத் தூண்களை நிறுத்தலாகாது; உங்கள் நாட்டில் வழிபடுவதற்கென்று செதுக்கிய கல் உருவங்களை வைக்கலாகாது. ஏனெனில், நானே உங்கள் கடவுளாகிய ஆண்டவர்."

2. கர்த்தராகிய இயேசு கிறிஸ்து மட்டுமே வழிபாட்டிற்குரியவர்

வழிபாடு (Worship) என்பது படைத்தவராகிய கடவுளுக்கு மட்டுமே உரியது. 

சிலுவை என்பது ஒரு கருவி மட்டுமே, அது கடவுள் அல்ல. 

மத்தேயு 4:10 – இயேசு சாத்தானை நோக்கி, "அப்பால் போ, சாத்தானே! 'உன் கடவுளாகிய ஆண்டவரை வணங்கி, அவர் ஒருவருக்கே பணிவிடை செய்' என்று மறைநூலில் எழுதியுள்ளது" என்றார்.

யோவான் 4:24 – "கடவுள் தூய ஆவியாய் இருக்கிறார். அவரை வழிபடுவோர் தூய ஆவியோடும் உண்மையோடும் வழிபட வேண்டும்." (பொருட்களை வைத்து அல்ல, ஆவியோடு வழிபட வேண்டும்).

3. சின்னங்களை வழிபாட்டுப் பொருளாக மாற்றியதற்குக் கண்டனம்

விவிலிய வரலாற்றில், கடவுள் கொடுத்த புனித சின்னங்களை மக்கள் வழிபடத் தொடங்கியபோது, ஆன்மீகத் தலைவர்கள் அதை உடைத்தெறிந்தனர்.

2 அரசர்கள் (இராஜாக்கள்) 18:4 – எசேக்கியா அரசர் இஸ்ரயேல் வரலாற்றில் செய்த சீர்திருத்தம்: "அவன் தொழுகை மேடுகளை அழித்து, நினைவுத் தூண்களைத் தகர்த்து, அஷேராக் கம்பங்களை வெட்டி வீழ்த்தினான்; மோசே செய்திருந்த வெண்கலப் பாம்பையும் நொறுக்கினான். ஏனெனில், அந்நாள்கள் வரை இஸ்ரயேல் மக்கள் அதற்குத் தூபம் காட்டி வந்தனர்."

விளக்கம்: 

மோசே செய்த வெண்கலப் பாம்பு ஒரு காலத்தில் மக்களைக் காப்பாற்றப் பயன்பட்ட புனித சின்னம். ஆனால், மக்கள் அதை வழிபடத் தொடங்கியதால் அது உடைக்கப்பட்டது. சிலுவையும் அதுபோலவே தியாகத்தின் சின்னமே தவிர, வழிபாட்டுப் பொருள் அல்ல.

4. சிலுவையின் உண்மையான பொருள் என்ன?

விவிலியத்தின்படி, சிலுவை என்பது நாம் வணங்குவதற்கான பொருள் அல்ல, அது கிறிஸ்துவின் தியாகத்தைப் பறைசாற்றும் செய்தி மற்றும் நாம் சுமக்க வேண்டிய ஆன்மீகப் பொறுப்பு.

1 கொரிந்தியர் 1:18 – "சிலுவை பற்றிய செய்தி அழிந்து போகிறவர்களுக்கு மடமை; ஆனால் மீட்புப் பெறும் நமக்கோ அது கடவுளின் வல்லமை." (சிலுவை என்பது ஒரு 'செய்தி' மற்றும் 'வல்லமை', அது வணக்கத்திற்குரிய விக்கிரகம் அல்ல).

லூக்கா 9:23 – இயேசு எல்லாரையும் நோக்கி, "என்னைத் பின்பற்ற விரும்பும் எவரும் தந்நலத்தைத் துறந்து, நாள்தோறும் தன் சிலுவையைத் தூக்கிக்கொண்டு என்னைப் பின்பற்றட்டும்" என்றார். (இங்கு சிலுவை என்பது நாம் ஏற்க வேண்டிய துன்பங்களையும் கடமைகளையும் குறிக்கிறதே தவிர, கழுத்திலோ சுவற்றிலோ தொங்கும் பொருளைக் குறிக்கவில்லை).

சுருக்கம்

கிறிஸ்தவர்கள் சிலுவையை இயேசுவின் அன்பின் அடையாளமாக மதிக்கலாமே (Respect) தவிர, அதற்குப் பூசைகள் செய்வதோ, அதனிடம் வேண்டுதல் வைப்பதோ, அதை வழிபடுவதோ (Worship) விவிலியக் போதனைகளுக்கு எதிரானது. 

வழிபாடு என்பது பிதா, குமாரன், தூய ஆவி என்ற மூவொரு கடவுளுக்கு மட்டுமே உரியது.

கிறிஸ்துவின் பணியில் சகோதரன் சிலுவை ராஜா. 

9841711591.