எப்படி ஜெபிக்க வேண்டும் ?

கிறிஸ்தவ ஆவிக்குரிய வாழ்க்கையின் மூச்சுக் காற்றாகவும், இறைவனுக்கும் மனிதனுக்கும் இடையே உள்ள உறவின் பாலமாகவும் விளங்குவது ஜெபமாகும். ஜெபம் என்பது ஏதோ ஒரு சடங்கோ அல்லது நம்முடைய தேவைகளின் பட்டியலை இறைவனிடம் வாசித்துக் காட்டும் ஒரு கடமையோ அல்ல; அது பிரபஞ்சத்தைப் படைத்த தேவனோடு நாம் செய்யும் ஆழமான ஆவிக்குரிய உரையாடலாகும்.

சீஷர்கள் இயேசுவோடு இருந்த காலத்தில், அவர் செய்த அற்புதங்களைக் கண்டு வியந்ததை விட, அவருடைய ஜெப வாழ்க்கையைக் கண்டு ஆச்சரியப்பட்டு, "ஆண்டவரே, எமக்கும் ஜெபிக்கக் கற்றுத்தாரும்" (லூக்கா 11:1) என்று ஆவலோடு கேட்டார்கள். ஏனெனில், தவறான முறையில் செய்யப்படும் ஜெபங்கள் இறைவனால் கேட்கப்படுவதில்லை என்பதையும், வேதாகம நெறிமுறைகளின்படி தகுந்த தகுதிகளோடு ஏறெடுக்கப்படும் ஜெபமே வல்லமையுள்ள கிரியைகளைச் செய்யும் என்பதையும் அவர்கள் உணர்ந்திருந்தனர்.

இன்றைய காலகட்டத்தில் பலர் தங்களுக்குத் தோன்றியபடி ஜெபிக்கிறார்கள். ஆனால், திருவிலக்கியத்தின் (பைபிள்) படி, நம்முடைய ஜெபங்கள் பரலோகத்தை அசைக்க வேண்டுமானால், அதற்குச் சில ஆவிக்குரிய தகுதிகளும், ஒழுக்கமுறைகளும் அவசியம் என்று வேதம் தெளிவாக வழிகாட்டுகிறது. விசுவாசம், தாழ்மை, தேவனுடைய சித்தம், இயேசுவின் நாமம் மற்றும் பரிசுத்த ஆவியானவரின் துணை போன்ற மிக முக்கியமான கூறுகள் இணையும்போதே நம் ஜெபம் இறைவனுக்கு உகந்ததாக மாறுகிறது.

எனவே, நாம் எப்படி ஜெபிக்க வேண்டும், ஜெபத்தின் போது நம் இருதய நிலை எப்படி இருக்க வேண்டும் என்பது குறித்த உன்னதமான வேதாகம ஆலோசனைகளையும், அதற்குரிய திருவசன ஆதாரங்களையும் பின்வரும் குறிப்புகளின் அடிப்படையில் விரிவாகக் காண்போம்.

1). இயேசு கற்றுத்தந்த மாதிரி ஜெபம்

சீஷர்கள் இயேசுவிடம் "எங்களுக்கு ஜெபிக்கக் கற்றுத்தாரும்" என்று கேட்டபோது, அவர் ஒரு மாதிரியான ஜெபத்தைக் கற்றுத்தந்தார். இதுவே நாம் எப்படி ஜெபிக்க வேண்டும் என்பதற்கான அடிப்படை வடிவம்.

மத்தேயு 6:9-13 (பரலோக ஜெபம்) – இறைவனைப் புகழ்வது, அவருடைய சித்தம் செய்யப்பட வேண்டுவது, நம்முடைய அன்றாட தேவைகளைக் கேட்பது, பாவ மன்னிப்பு மற்றும் தீமையிலிருந்து பாதுகாப்பு ஆகியவற்றைக் கொண்டதாக ஜெபம் இருக்க வேண்டும். 

2). பிதாவினிடத்தில் இயேசுவின் நாமத்தில் ஜெபிக்க வேண்டும்

நாம் ஜெபங்களை பிதா ஆகிய இறைவனிடம் ஏறெடுக்க வேண்டும்; ஆனால், அவை இயேசு கிறிஸ்துவின் நாமத்தினாலே கேட்கப்பட வேண்டும். 

யோவான் 16:23,24 – "நீங்கள் என் நாமத்தினாலே பிதாவினிடத்தில் கேட்டுக்கொள்ளுகிறதெதுவோ அதை அவர் உங்களுக்குத் தருவார்... கேளுங்கள், அப்பொழுது உங்கள் சந்தோஷம் நிறைவாயிருக்கும்படி பெற்றுக்கொள்வீர்கள்." 

3). விசுவாசத்தோடு ஜெபிக்க வேண்டும்

ஜெபிக்கும்போது, நாம் கேட்கும் காரியத்தை இறைவன் செய்வார் என்ற முழுமையான விசுவாசம் இருதயத்தில் இருக்க வேண்டும். சந்தேகத்தோடு ஜெபிக்கக் கூடாது.

மாற்கு 11:24 – "நீங்கள் ஜெபம்பண்ணும்போது எவைகளைக் கேட்டுக்கொள்ளுவீர்களோ, அவைகளைப் பெற்றுக்கொள்வோம் என்று விசுவாசியுங்கள், அப்பொழுது அவைகள் உங்களுக்கு உண்டாகும்." 

4). தேவனுடைய சித்தத்தின்படி ஜெபிக்க வேண்டும்

நம்முடைய சுயநலமான ஆசைகளுக்காக அல்லாமல், தேவனுடைய விருப்பத்திற்கும் திட்டத்திற்கும் உட்பட்டு ஜெபிக்க வேண்டும்.

1 யோவான் 5:14 – "நாம் எதையாகிலும் அவருடைய சித்தத்தின்படி கேட்டால், அவர் நமக்குச் செவிகொடுக்கிறாரென்பதே அவரை நோக்கி நாம் கொண்டிருக்கிற தைரியம்." 

5). மன்னிக்கும் இருதயத்தோடு ஜெபிக்க வேண்டும்

மற்றவர்கள் நமக்குச் செய்த தவற்றை நாம் மன்னிக்காமல் ஜெபித்தால், நம்முடைய ஜெபத்தை இறைவன் கேட்க மாட்டார்.

மாற்கு 11:25 – "நீங்கள் நின்று ஜெபம்பண்ணும்போது, ஒருவன்மேல் உங்களுக்கு யாதொரு குறைவிருந்தால், அதை அவனுக்கு மன்னியுங்கள்; அப்பொழுது பரலோகத்திலிருக்கிற உங்கள் பிதாவும் உங்கள் தப்பிதங்களை உங்களுக்கு மன்னிப்பார்." 

6). பெருமையின்றி, தாழ்மையோடு ஜெபிக்க வேண்டும்

மனிதர்கள் பார்க்க வேண்டும் என்ற வெளிவேஷத்திற்கோ, பெருமைக்காகவோ ஜெபிக்கக் கூடாது. நம் பாவங்களை உணர்ந்த தாழ்மையான ஜெபத்தையே தேவன் கேட்கிறார். 

மத்தேயு 6:5,6 – 

"நீயோ ஜெபம்பண்ணும்போது, உன் உள்வீட்டிற்குள் பிரவேசித்து, உன் கதவைப்பூட்டி, அந்தரங்கத்திலிருக்கிற உன் பிதாவை நோக்கி ஜெபம்பண்ணு."

சங்கீதம் 51:17 – "தேவனுக்கேற்கும் பலிகள் நொறுங்குண்ட ஆவிதான்; தேவனே, நொறுங்குண்டதும் நருங்குண்டதுமான இருதயத்தை நீர் புறக்கணியீர்." 

7). விடாமுயற்சியோடு (இடைவிடாமல்) ஜெபிக்க வேண்டும்

ஒருமுறை ஜெபித்துவிட்டு சோர்ந்து போகாமல், பதில் கிடைக்கும் வரை தொடர்ந்து ஊக்கத்தோடு ஜெபிக்க வேண்டும்.

1 தெசலோ 5:17 –

 "இடைவிடாமல் ஜெபம்பண்ணுங்கள்."

லூக்கா 18:1 – "சோர்ந்துபோகாமல் எப்பொழுதும் ஜெபம்பண்ணவேண்டும்." 

8). பரிசுத்த ஆவியானவரின் துணையோடு ஜெபிக்க வேண்டும்

சில நேரங்களில் எப்படி ஜெபிப்பது என்று நமக்குத் தெரியாது. அப்போது நமக்குள்ளே இருக்கும் பரிசுத்த ஆவியானவர் நமக்காக ஜெபிப்பார். 

ரோமர் 8:26 – 

"நாம் தகுதியானபடி வேண்டிக்கொள்ள வேண்டியது என்னவென்று அறியாமலிருக்கிறபடியால், ஆவியானவர்தாமே வாக்குக்கெட்டாத பெருமூச்சுகளோடு நமக்காக வேண்டுதல்செய்கிறார்." 

புரிந்து கொண்டு ஜெபம் பண்ணுங்கள் கர்த்தர் உங்களை ஆசீர்வதிப்பாராக ஆமென் 

கிறிஸ்துவின் பணியில் சகோதரன் சிலுவை ராஜா 

9841711591