கிருபை எவ்வாறு கிடைக்கிறது

தேவனுடைய கிருபை என்பது தகுதியற்ற நமக்கு அவர் அளிக்கும் உன்னதமான, நிபந்தனையற்ற அன்பின் வெளிப்பாடாகும். கிறிஸ்தவ விசுவாசத்தின் அடித்தளமே இந்த கிருபையின் மேல் தான் கட்டப்பட்டுள்ளது. ஒரு விசுவாசி தன் சொந்த பலத்தினாலோ அல்லது கிரியைகளினாலோ இரட்சிப்பையோ ஆவிக்குரிய ஆசீர்வாதங்களையோ பெற்றுக்கொள்ள முடியாது; மாறாக, தேவனுடைய கிருபையினால் மட்டுமே அவை சாத்தியமாகிறது.

வேதாகமத்தில் பழைய ஏற்பாடு முதல் புதிய ஏற்பாடு வரை, தேவன் மனிதர்கள் மீது பொழிந்த கிருபையின் வரலாறுகள் நிறைந்துள்ளன. கிருபை என்பது தேவன் நமக்கு இலவசமாகத் தரும் கொடையாக இருந்தாலும், அதை நம் வாழ்வில் பெற்றுக்கொள்வதற்கும், அதில் நிலைத்திருப்பதற்கும் ஒரு விசுவாசியிடம் சில ஆவிக்குரிய தகுதிகளும் ஆயத்தங்களும் எதிர்பார்க்கப்படுகின்றன.

வேத வசனங்களின் அடிப்படையிலும், விவிலியப் பரிசுத்தவான்களின் வாழ்க்கை உதாரணங்களின் மூலமும், தேவ கிருபையை ஒரு விசுவாசி எவ்வாறு தன் சொந்த வாழ்க்கையில் சுதந்தரித்துக் கொள்ள முடியும் என்பதைப் பற்றிய விரிவான ஆவிக்குரிய விளக்கங்களை இக்கட்டுரையில் காண்போம்.

1). தாழ்மை உள்ளவர்களாக இருக்க வேண்டும்

தேவன் பெருமையுள்ளவர்களுக்கு எதிர்த்து நிற்கிறார், தாழ்மையுள்ளவர்களுக்கோ கிருபை அளிக்கிறார். 

வேத வசனம்: "தேவன் பெருமையுள்ளவர்களுக்கு எதிர்த்து நிற்கிறார், தாழ்மையுள்ளவர்களுக்கோ கிருபை அளிக்கிறார்." (யாக்கோபு 4:6)

பரிசுத்தவான் ஒப்பீடு (மரியாள்): இயேசுவின் தாயாகிய மரியாள் தன்னை ஒரு தாழ்மையான அடிமையாகக் கருதினார். அவளுடைய தாழ்மையைக் கண்டு தேவன் அவளுக்குப் பெரிய கிருபையை அளித்தார் 

(லூக்கா 1:48). 

2). கிருபாசனத்தை தைரியமாக நெருங்க வேண்டும்

நம்முடைய பாவங்கள் மற்றும் பலவீனங்களின் மத்தியிலும், இயேசுவின் மூலமாக தேவனிடம் ஜெபத்தில் சேர வேண்டும்.

வேத வசனம்: 

"நாம் இரக்கத்தைப் பெற்றுக்கொள்ளவும், ஏற்ற சமயத்தில் சகாயஞ்செய்யுங்கிருபையை அடையவும், தைரியமாய்க் கிருபாசனத்தண்டையிலே சேரக்கடவோம்." (எபிரெயர் 4:16) 

பரிசுத்தவான் ஒப்பீடு (அப்போஸ்தலனாகிய பவுல்): 

பவுலுக்கு மாம்சத்தில் ஒரு முள் இருந்தது. அதை நீக்க மூன்று முறை ஜெபித்தார். அப்போது தேவன், "என் கிருபை உனக்குப்போதும்" என்றார். பலவீனத்திலும் பவுல் தேவ கிருபையைச் சார்ந்துகொண்டார் 

(2கொரிந்தியர்12:9). 

3. விசுவாசம் உள்ளவர்களாக இருக்க வேண்டும்

கிருபை என்பது தேவனுடைய கொடை, ஆனால் அதை விசுவாசத்தின் மூலமாக மட்டுமே நாம் பெற்றுக்கொள்ள முடியும். 

வேத வசனம்: "கிருபையினாலே விசுவாசத்தைக்கொண்டு இரட்சிக்கப்பட்டீர்கள்; இது உங்களால் உண்டானதல்ல, இது தேவனுடைய ஈவு." (எபேசியர் 2:8)

பரிசுத்தவான் ஒப்பீடு (ஆபிரகாம்): ஆபிரகாம் தன் விசுவாசத்தினால் தேவனுக்கு முன்பாக நீதிமானாக்கப்பட்டார். சூழ்நிலைகள் சாதகமாக இல்லாதபோதும் தேவனை விசுவாசித்ததால், அவர் பெரிய கிருபையையும் ஆசீர்வாதத்தையும் பெற்றார் (ரோமர் 4:3). 

4. தேவனுக்கு பயந்து, உத்தமமாய் நடக்க வேண்டும்

தேவனுடைய வழிகளில் நடப்பவர்களுக்கு அவர் தம்முடைய கிருபையையும் மகிமையையும் தர மறுப்பதில்லை.

வேத வசனம்: "தேவனாகிய கர்த்தர் சூரியனும் கேடகமுமானவர்; கர்த்தர் கிருபையையும் மகிமையையும் தருவார்; உத்தமமாய் நடக்கிறவர்களுக்கு நன்மையை வழங்காமல் இரார்." (சங்கீதம் 84:11)

பரிசுத்தவான் ஒப்பீடு (நோவா): 

நோவா தன் காலத்தில் இருந்த மனிதர்களுக்குள்ளே நீதிமானும் உத்தமனுமாய் இருந்தார். தேவனோடு சஞ்சரித்துக் கொண்டிருந்த நோவாவுக்குக் கர்த்தருடைய கண்களில் கிருபை கிடைத்தது (ஆதியாகமம் 6:8-9). 

இந்த ஆவிக்குரிய காரியங்களை நம் வாழ்வில் கடைப்பிடிக்கும்போது தேவ கிருபை நம்மை நிரப்பும்.

கர்த்தர் உங்களை ஆசீர்வதிப்பாராக ஆமென். 

கிறிஸ்துவின் பணியில் சகோதரன் சிலுவை ராஜா 

9841711591.