தசமபாகத்தை விட

பரிசுத்த வேதாகமத்தில் பழைய ஏற்பாட்டுக் காலத்தின் இறுதிப் தீர்க்கதரிசனப் புத்தகமாகிய மல்கியாவில், தேவன் மனிதனுக்குக் கொடுத்த ஆசீர்வாதத்தின் உன்னதமான வாக்குத்தத்தமே 3-ஆம் அதிகாரம் 10-வது வசனமாகும். "என் ஆலயத்தில் ஆகாரம் உண்டாயிருக்கும்படித் தசமபாகங்களையெல்லாம் பண்டசாலையிலே கொண்டுவாருங்கள்; அப்பொழுது நான் வானத்தின் பலகணிகளைத் திறந்து, இடங்கொள்ளாமற்போகுமட்டும் உங்கள்மேல் ஆசீர்வாதத்தை வருஷிக்கமாட்டேனோவென்று அதினால் என்னைச் சோதித்துப் பாருங்கள்" என்று சேனைகளின் கர்த்தர் சவால் விடுகிறார். இந்த வசனத்தைக் கொண்டு, "தசமபாகம் கொடுத்த உங்களை கர்த்தர் இடம் கொள்ளாமல் போகும் மட்டும் ஆசீர்வதித்தாரா?" என்று இன்று பலர் கேள்வி எழுப்புவதைக் காண்கிறோம். 

இத்தகைய கேள்விகள் வேதாகமத்திற்கு எதிரானவை அல்ல; மாறாக, விசுவாசத்தின் ஆழத்தையும் தேவனுடைய வாக்குத்தத்தங்களின் மெய்யான அர்த்தத்தையும் நாம் ஆராய்ந்து அறிந்துகொள்ள ஒரு நல்வாய்ப்பாக அமைகின்றன. பழைய ஏற்பாட்டின் கட்டாயக் கடமையாக இருந்த தசமபாகம், புதிய ஏற்பாட்டின் கிருபையின் காலத்தில் எவ்வாறு அன்பின் வெளிப்பாடாகவும், இருதயத்தின் அர்ப்பணிப்பாகவும் மாறுகிறது என்பதை வேதாகமப் பார்வையில் தெளிவுபடுத்துவதே இந்த ஆக்கத்தின் நோக்கமாகும்.

1. தேவனே "சோதித்துப் பாருங்கள்" என்று கூறுகிறார்

மல்கியா 3:10-ல் தேவன், "அதினால் என்னைச் சோதித்துப் பாருங்கள்" 

(Test me in this) என்று அவரே மனிதர்களுக்கு சவால் விடுகிறார். எனவே, இந்த வாக்குத்தத்தம் நிறைவேறுகிறதா என்று சோதிப்பதோ, அது குறித்து கேள்வி எழுப்புவதோ வேதத்திற்கு எதிரானது அல்ல; தேவனே அதற்கு அனுமதி அளித்துள்ளார்.

2. ஆசீர்வாதம் என்பது பணத்தை மட்டும் குறிப்பது அல்ல

இடம் கொள்ளாத ஆசீர்வாதம் என்பது வெறும் வங்கிச் சேமிப்போ அல்லது உலகப் பிரகாரமான செல்வமோ மட்டும் அல்ல. வேதாகமத்தின் படி, சமாதானம், சந்தோஷம், நல்ல ஆரோக்கியம், குடும்ப ஒற்றுமை மற்றும் கர்த்தருக்குள் வளரும் ஆன்மீக வாழ்க்கை ஆகிய அனைத்துமே இடம் கொள்ளாத பெரிய ஆசீர்வாதங்கள் ஆகும்.

3. அழிப்பவனை விலக்கும் பாதுகாப்பு (மல்கியா 3:11)

தசமபாகம் கொடுக்கும்போது, "பூச்சிகளை உங்கள் நிமித்தம் அதட்டுவேன்" என்று தேவன் கூறுகிறார். இதன் பொருள், வீண் செலவுகள், திடீர் மருத்துவச் செலவுகள், தொழிலில் ஏற்படும் நஷ்டங்கள் போன்றவற்றிலிருந்து தேவன் நம்மைப் பாதுகாக்கிறார் என்பதாகும். வராமல் தடுக்கும் நஷ்டமும் ஒரு பெரிய ஆசீர்வாதமே.

4. இருதயத்தின் நோக்கமே முக்கியம் 

(2கொரிந்தியர் 9:7)

மல்கியா 3:10-ஐ ஒரு வியாபார ஒப்பந்தம் போலப் பார்க்கக் கூடாது ("நான் கொடுத்தால் கர்த்தர் தருவார்" என்ற கட்டாயம்). புதிய ஏற்பாட்டின் படி, ஒருவர் "விசனமாயுமல்ல, கட்டாயமாயுமல்ல, உற்சாகமாய்" கொடுக்க வேண்டும். தவறான நோக்கத்தோடு கொடுத்தால், அங்கு ஆசீர்வாதம் தடையடலாம். 

5. ஆசீர்வாதத்தின் காலமும் தேவனுடைய சித்தமும்

தேவனுடைய ஆசீர்வாதம் மனிதர்கள் எதிர்பார்க்கும் நேரத்திலோ அல்லது வழியிலோ வராமல் போகலாம். யோசேப்பு, யோபு போன்ற வேதப் பாத்திரங்கள் தற்காலிகமாகப் பற்றாக்குறையைச் சந்தித்தாலும், கர்த்தர் சரியான காலத்தில் அவர்களைப் பல மடங்கு ஆசீர்வதித்தார். தேவனுடைய நேரமே சரியானது. 

6. புதிய ஏற்பாட்டுப் பார்வை 

(மத்தேயு 23:23)

இயேசு கிறிஸ்து தசமபாகத்தைக் குறைத்து மதிப்பிடவில்லை, ஆனால் அதைவிட முக்கியமாக "நீதியையும் இரக்கத்தையும் விசுவாசத்தையும்" கடைப்பிடிக்க வேண்டும் என்றார். வெறும் கடமைக்காகக் கொடுத்துவிட்டு, அன்பும் நீதியும் இல்லாமல் வாழ்ந்தால் அந்த ஆசீர்வாதத்தை நம்மால் அனுபவிக்க முடியாது.

7. விசுவாசத்தின் பரீட்சை

இப்படிப்பட்ட கேள்விகள் ஒருவருடைய விசுவாசத்தைச் சோதிக்கின்றன. "காணாமல் நம்புகிறவர்கள் பாக்கியவான்கள்" (யோவான் 20:29). உலகக் கண்களுக்குத் தெரியாத ஆவிக்குரிய ஆசீர்வாதங்களை, விசுவாசம் உள்ளவர்களால் மட்டுமே ஆவிக்குரிய கண்களால் கண்டு சாட்சி பகர முடியும்.

புது உடன்படிக்கையின் சத்தியம்:

1.நியாயப்பிரமாணத்திலிருந்து கிருபையின் காலம்

பழைய ஏற்பாட்டில் தசமபாகம் என்பது ஒரு கட்டாயக் கடமையாக (Law) இருந்தது. ஆனால், புதிய ஏற்பாட்டில் நாம் கிருபையின் கீழ் வாழ்கிறோம். இயேசு கிறிஸ்து சிலுவையில் பலியானதன் மூலம், நாம் கடமைக்காக அல்லாமல், கர்த்தர் மேல் உள்ள அன்பின் நிமித்தமே காணிக்கைகளைச் செலுத்துகிறோம் (ரோமர் 6:14). 

2. உற்சாகமாகக் கொடுப்பவரையே தேவன் நேசிக்கிறார்

புதிய ஏற்பாட்டில் பத்தில் ஒரு பங்கு என்ற அளவுமுறை கட்டாயமாக்கப்படவில்லை. 

(2 கொரிந்தியர் 9:7)-ன் படி, "அவனவன் தன் இருதயத்தில் நியமித்தபடியே கொடுக்கக்கடவன்; விசனமாயுமல்ல, கட்டாயமாயுமல்ல, உற்சாகமாய்க் கொடுக்கிறவனிடத்தில் தேவன் பிரியமாயிருக்கிறார்." கட்டாயமில்லாமல் கொடுக்கும்போதே ஆசீர்வாதம் முழுமையடைகிறது.

3. பத்தில் ஒன்று அல்ல, அனைத்தும் தேவனுடையதே

பழைய ஏற்பாடு பத்தில் ஒரு பங்கைக் கேட்டது. ஆனால் புதிய ஏற்பாட்டில், ஆரம்பகால கிறிஸ்தவர்கள் தங்கள் ஆஸ்திகள், நிலங்கள் அனைத்தையும் விற்று, அப்போஸ்தலர்களுடைய பாதத்தில் வைத்தார்கள் (அப்போஸ்தலர் 4:34-35). நம்மிடம் உள்ள அனைத்தும் தேவனால் கொடுக்கப்பட்டது என்ற உயர்ந்த விசுவாசமே புதிய ஏற்பாட்டின் போதனை.

4. உள்நோக்கமே முக்கியம் (Motivations)

"நான் கொடுத்தால் எனக்குத் திருப்பித் தருவார்" என்ற சுயநல நோக்கத்தோடு (Prosperity Gospel) விதைப்பதை புதிய ஏற்பாடு ஆதரிக்கவில்லை. இயேசு இரண்டு காசுகளைப் போட்ட ஏழை விதவையின் காணிக்கையை ஆசீர்வதித்தார் (மாற்கு 12:41-44). ஏனெனில், அவளுடைய இருதயத்தின் அர்ப்பணிப்பு பெரியதாக இருந்தது. அளவு அல்ல, இருதயமே முக்கியம். 

5. பரலோகத்தில் சேர்க்கப்படும் பொக்கிஷம்

உலகப்பிரகாரமான "இடம் கொள்ளாத" ஆசீர்வாதத்தை விட, அழியாத பரலோக ஆசீர்வாதங்களையே புதிய ஏற்பாடு வலியுறுத்துகிறது. மத்தேயு 6:20-ல் இயேசு, "பூச்சியாவது துருவாவது அழிக்காதபடி... பரலோகத்திலே உங்களுக்குப் பொக்கிஷங்களைச் சேர்த்துவையுங்கள்" என்கிறார். ஆசீர்வாதம் என்பது பரலோக கணக்கில் சேரும் பலன் ஆகும்.

6. விதைப்பு மற்றும் அறுவடை விதி

2 கொரிந்தியர் 9:6-ல் பவுல், "சிறுக விதைக்கிறவன் சிறுக அறுப்பான், பெருக விதைக்கிறவன் பெருக அறுப்பான்" என்று கூறுகிறார். நாம் தேவன் பேரில் உள்ள விசுவாசத்தினால் எவ்வளவு தாராளமாக விதைக்கிறோமோ, அவ்வளவு அதிகமாக கர்த்தர் நம்முடைய ஆவிக்குரிய மற்றும் சரீர தேவைகளைச் சந்தித்து ஆசீர்வதிப்பார்.

7. கிறிஸ்துவுக்குள் சகல ஆசீர்வாதங்களும் உண்டு

எபேசியர் 1:3-ன்படி, "கிறிஸ்துவுக்குள் உன்னதங்களிலே சகல ஆவிக்குரிய ஆசீர்வாதத்தினாலும் நம்மை ஆசீர்வதித்திருக்கிறார்." புதிய ஏற்பாட்டு விசுவாசிக்கு, கிறிஸ்துவை விடப் பெரிய ஆசீர்வாதம் எதுவும் இல்லை. கிறிஸ்து நமக்குள் இருக்கும்போது, நாம் ஏற்கனவே இடம் கொள்ளாத ஆசீர்வாதத்தைப் பெற்றவர்களாகவே வாழ்கிறோம். ஆமேன் 

கிறிஸ்துவின் பணியில் சகோதரன் 

சிலுவை ராஜா.

9841711591.