தவறு செய்யும் ஊழியர்களைக் கடிந்துகொள்ளும் வேதவழிகள்

கிறிஸ்தவத் திருச்சபையின் தூண்களாகவும், தேவனுடைய மந்தையை வழிநடத்தும் மேய்ப்பர்களாகவும் ஊழியர்கள் கருதப்படுகிறார்கள். ஆனால், தற்கால சூழலில் சிலர் தேவனுடைய பரிசுத்த வசனத்திற்கும் வேதாகம நெறிமுறைகளுக்கும் விரோதமான உபதேசங்களையோ அல்லது தவறான வாழ்க்கை முறைகளையோ பின்பற்றி ஊழியங்களைச் செய்வது சபைக்கும் விசுவாசிகளுக்கும் பெரும் சவாலாக அமைந்திருக்கிறது.
பரிசுத்த வேதாகமம் கள்ள உபதேசங்களையும், வசனத்திற்கு முரணான ஊழியங்களையும் அடியோடு வெறுக்கிறது; அதே நேரத்தில், தவறு செய்யும் ஊழியர்களை எவ்வாறு அணுக வேண்டும், அவர்களை எவ்விதம் கடிந்து கொள்ள வேண்டும் என்பதற்கும் தெளிவான ஆவிக்குரிய ஒழுங்குமுறைகளை வகுத்துள்ளது. நாம் நம்முடைய சொந்தக் கோபத்தினாலோ அல்லது சுயநலத்தினாலோ ஒரு ஊழியரைத் தீர்க்காமல், சத்தியத்தைப் பாதுகாக்கவும் சபையைச் சீர்படுத்தவும் வேதாகம ஆதாரங்களின்படி எவ்வாறு செயல்பட வேண்டும் என்பதற்கான விரிவான வழிகாட்டுதலை இந்தத் தொகுப்பு விளக்குகிறது.

1. தனிமையில் நேருக்கு நேர் பேசுதல் (முதற்படி)
ஒரு ஊழியர் தவறு செய்யும்போது, அதை உடனே நாலு பேருக்கு முன்பாகப் பேசாமல், முதலில் அவரிடம் தனிமையாகப் பேச வேண்டும் என்று வேதாகமம் கற்பிக்கிறது.
வசன ஆதாரம்: "உன் சகோதரன் உனக்கு விரோதமாகக் குற்றஞ்செய்தால், அவனிடத்தில் போய், நீயும் அவனும் தனித்திருக்கையில், அவன் குற்றத்தை அவனுக்கு உணர்த்து..."
(மத்தேயு 18:15).
விளக்கம்:
இது அவருடைய தவறை அவர் உணர்ந்து மனந்திரும்புவதற்குக் கொடுக்கப்படும் முதல் வாய்ப்பாகும்.

2. சாட்சிகளோடு உறுதிப்படுத்துதல்
தனிமையாகப் பேசும்போது அவர் கேட்காவிட்டால், அடுத்த கட்டமாக சபையின் பொறுப்புள்ள ஆவிக்குரிய சாட்சிகளை அழைத்துக்கொண்டு அவரிடம் பேச வேண்டும்.
வசன ஆதாரம்: "...ஒன்றிரண்டு சாட்சிகளுடைய வாயினாலே சகல காரியங்களும் நிலைவரப்படும்படி, இன்னும் ஒருவனை அல்லது இருவரை உன்னோடே கூட்டிக்கொண்டு போ." (மத்தேயு 18:16).
விளக்கம்:
குற்றம் தனிப்பட்ட கோபத்தால் சாட்டப்படவில்லை என்பதையும், அது வசனத்திற்கு விரோதமானது தான் என்பதையும் உறுதிப்படுத்த இது அவசியம்.

3. சபைக்குத் தெரியப்படுத்துதல்
சாட்சிகள் சொல்லியும் அவர் கேட்க மறுத்தால், அந்த விஷயத்தைச் சபையின் தலைவர்களிடமோ அல்லது ஒட்டுமொத்த சபையிடமோ கொண்டு செல்ல வேண்டும்.
வசன ஆதாரம்: "அவர்களுக்கும் அவன் கேட்காவிட்டால், சபைக்குத் தெரியப்படுத்து; சபைக்கும் கேட்காதிருப்பானானால், அவன் உனக்கு அஞ்ஞானியைப்போலவும் ஆயக்காரனைப்போலவும் இருப்பானாக." (மத்தேயு 18:17).

4. பகிரங்கமாகக் கடிந்துகொள்ளுதல் (பொதுவான குற்றங்களுக்கு)
முதிர்வயதுள்ள ஊழியர்கள் அல்லது பொறுப்பில் இருப்பவர்கள் தொடர்ந்து சத்தியத்திற்கு விரோதமாக பாவம் செய்யும்போது, மற்றவர்கள் பயப்படும்படி அவர்களைப் பகிரங்கமாகக் கடிந்துகொள்ள வேண்டும் என்று பவுல் தீமோத்தேயுவுக்கு எழுதுகிறார்.
வசன ஆதாரம்: "பாவஞ்செய்தவர்களை மற்றவர்கள் பயப்படும்படிக்கு எல்லாருக்கும் முன்பாகக் கடிந்துகொள்." (1 தீமோத்தேயு 5:20).
விளக்கம்:
குறிப்பாக, மூப்பர்களுக்கு எதிரான குற்றச்சாட்டுகளை இரண்டு அல்லது மூன்று சாட்சிகள் இல்லாமல் ஏற்றுக்கொள்ளக் கூடாது என்றும் வேதாகமம் எச்சரிக்கிறது
(1 தீமோ 5:19).

5. சாந்தத்தோடும் ஆவிக்குரிய சிந்தனையோடும் செய்தல்
ஊழியர்களைக் கடிந்துகொள்ளும் போது நம்முடைய நோக்கம் அவர்களை அழிப்பதல்ல, மாறாக அவர்களைக் குணப்படுத்துவதே ஆகும். எனவே, கோபத்தோடோ அல்லது பெருமையோடோ அல்லாமல் சாந்தத்தோடு செய்ய வேண்டும்.
வசன ஆதாரம்: "சகோதரரே, ஒருவன் யாதொரு குற்றத்திலே அகப்பட்டால், ஆவிக்குரியவர்களாகிய நீங்கள் சாந்தமுள்ள ஆவியோடே அப்படிப்பட்டவனைச் சீர்படுத்தவேண்டும்..." (கலாத்தியர் 6:1).
வசன ஆதாரம்: "கர்த்தருடைய ஊழியக்காரன் சண்டைசெய்யாமல், எல்லாரிடத்திலும் சாந்தமுள்ளவனும்... தீமையைச் சகிக்கிறவனுமாயிருக்க வேண்டும்." (2 தீமோத்தேயு 2:24).

6. வேத வசனத்தையே ஆயுதமாகப் பயன்படுத்துதல்
நம்முடைய சொந்தக் கருத்துக்களையோ, பாரம்பரியங்களையோ வைத்து ஊழியர்களைக் கடிந்துகொள்ளக் கூடாது. தேவனுடைய ஆவியினால் அருளப்பட்ட பரிசுத்த வேதவசனங்களை மட்டுமே அதற்கு ஆதாரமாகப் பயன்படுத்த வேண்டும்.
வசன ஆதாரம்: "வேதவாக்கியங்களெல்லாம் தேவாவியினால் அருளப்பட்டிருக்கிறது; தேவனுடைய மனிதன் தேறினவனும், எந்த நற்கிரியையுஞ் செய்யத் தகுதியுள்ளவனுமாகும்படி, அவைகள் உபதேசத்துக்கும், கடிந்துகொள்ளுதலுக்கும், சீர்திருத்தலுக்கும், நீதியைப் படிப்பிக்குதலுக்கும் பிரயோஜனமுள்ளவைகளாயிருக்கிறது." (2 தீமோத்தேயு 3:16-17).

7. கள்ள உபதேசக்காரர்களைக் கண்டித்து, விலகுதல்
தவறுகளைச் சுட்டிக்காட்டியும் திருந்தாமல், தொடர்ந்து வசனத்திற்கு விரோதமான கள்ள உபதேசங்களைச் பரப்பி, சபையைப் பிரிப்பவர்களாக இருந்தால், அவர்களிடம் கடுமையான எச்சரிக்கையோடு விலகியிருக்க வேண்டும்.
வசன ஆதாரம்: "பிரிவினைகளை உண்டாக்குகிற ஒருவனுக்கு முதலாம் இரண்டாம் புத்திசொன்னபின்பு அவனை விட்டுவிலகு."
(தீத்து 3:10).
வசன ஆதாரம்: "சகோதரரே, நீங்கள் கற்றுக்கொண்ட உபதேசத்திற்கு விரோதமாகப் பிரிவினைகளையும் இடறல்களையும் உண்டாக்குகிறவர்களைக் குறித்து எச்சரிக்கையாயிருந்து, அவர்களை விட்டு விலகவேண்டுமென்று உங்களுக்குப் புத்திசொல்லுகிறேன்." (ரோமர் 16:17).

சுருக்கமாக: தேவனுடைய வசனத்திற்கு விரோதமாகச் செயல்படும் ஊழியர்களைக் கடிந்துகொள்ளும்போது, ஜெபத்தோடு, நேர்மையான நோக்கத்தோடு (Motivity), சாந்த குணத்தோடு மற்றும் வேதாகம ஒழுங்குமுறையின்படி (Order) அணுகுவதே சபையின் ஆவிக்குரிய வளர்ச்சிக்கு நல்லது.

கிறிஸ்துவின் பணியில் சகோதரன் சிலுவை ராஜா
9841711591.