நம்முடைய மனதில் தோன்றுவதெல்லாம் ஊழியமா ?

கிறிஸ்தவ ஊழியம் என்பது மனித எண்ணங்களின் வெளிப்பாடு அல்ல, அது தெய்வீக அழைப்பின் வெளிப்பாடு. பொதுவாக மனிதர்களாகிய நமக்கு, நன்மையான காரியங்களைச் செய்வதும், பிறருக்கு உதவி செய்வதும், நற்செய்தியைப் பரப்புவதும் நம் சொந்த சிந்தனையில் தோன்றும் நல்ல நோக்கங்களாக இருக்கலாம். ஆனால், விவிலியத்தின் (பைபிள்) பார்வையில், நம்முடைய சுய புத்தியில் அல்லது மனதில் தோன்றும் நல்ல எண்ணங்கள் அனைத்தும் உடனடியாக தேவனுடைய ஊழியமாக மாறிவிடுவதில்லை.
உண்மையான கிறிஸ்தவ ஊழியம் என்பது மனிதனுடைய திட்டமிடலோ அல்லது சுய விருப்பமோ அல்ல; அது முழுமையாக தேவனுடைய இறையாண்மை, அவருடைய சித்தம் மற்றும் பரிசுத்த ஆவியானவரின் ஏவுதல் ஆகியவற்றின் அடிப்படையில் அமைந்ததாகும். மனிதன் தன் சொந்த ஞானத்தால் தேவனை மகிமைப்படுத்த முடியாது என்பதை வேதம் தெளிவாகக் கற்பிக்கிறது.
எனவே, நம்முடைய தனிப்பட்ட சிந்தனைகளுக்கும், விவிலியம் கூறும் உண்மையான ஊழியத்திற்கும் இடையே உள்ள ஆவிக்குரிய வேறுபாடுகளை வேதாகம வசனங்களின் ஒளியில் விரிவாக ஆராய்வதே இந்தத் தொகுப்பின் நோக்கமாகும்.

1. தேவனுடைய சித்தம் vs மனித எண்ணம்
ஊழியம் என்பது நம்முடைய சொந்தத் திட்டம் அல்ல, அது தேவனுடைய விருப்பம்.
ஏசாயா 55:8-9 – "என் நினைவுகள் உங்கள் நினைவுகள் அல்ல, உங்கள் வழிகள் என் வழிகளும் அல்ல என்று கர்த்தர் சொல்லுகிறார். பூமியைப்பார்க்கிலும் வானங்கள் எப்படி உயர்ந்திருக்கிறதோ, அப்படியே உங்கள் வழிகளைப்பார்க்கிலும் என் வழிகளும், உங்கள் நினைவுகளைப்பார்க்கிலும் என் நினைவுகளும் உயர்ந்திருக்கிறது."
விளக்கம்:
நம் மனதில் தோன்றும் நல்ல காரியங்கள் கூட தேவனுடைய பார்வையில் ஊழியமாக இருக்க வேண்டியசியமில்லை. தேவனுடைய உயர்ந்த திட்டத்தின்படி செய்வதே ஊழியம்.

2. இயேசு கிறிஸ்துவின் மாதிரி
இயேசு இந்த பூமியில் ஊழியஞ்செய்த போது தன் சொந்த விருப்பத்தின்படி எதையும் செய்யவில்லை.
யோவான் 5:30 – "நான் என் சுயமாய் ஒன்றும் செய்கிறதில்லை... நான் என் சித்தத்தைத் தேடாமல், என்னை அனுப்பின பிதாவின் சித்தத்தைத் தேடுகிறபடியால் என் தீர்ப்பு நீதியாயிருக்கிறது."
யோவான் 6:38 – "என் சித்தத்தின்படி அல்ல, என்னை அனுப்பினவருடைய சித்தத்தின்படி செய்யவே நான் வானத்திலிருந்திறங்கி வந்தேன்."
விளக்கம்: ஊழியத்தின் உச்சக்கட்ட மாதிரியாகிய இயேசுவே பிதாவின் சித்தத்தைத்தான் செய்தார் எனில், நாமும் நம் மனதில் தோன்றுவதை அல்ல, தேவன் நமக்குக் கொடுக்கும் ஊழியத்தையே செய்ய வேண்டும்.

3. பரிசுத்த ஆவியானவரின் வழிநடத்துதல்
ஆதித்திருச்சபையில் அப்போஸ்தலர்கள் தங்கள் சொந்த புத்தியின்படி ஊழியப் பயணங்களை திட்டமிடவில்லை. பரிசுத்த ஆவியானவரே அவர்களை வழிநடத்தினார்.
அப்போஸ்தலர் 16:6-7 – அவர்கள் ஆசியாவிலே திருவசனத்தைச் சொல்லாதபடிக்குத் பரிசுத்த ஆவியினாலே தடைபட்டு, பிரிகியா கலாத்தியா நாடுகளைக் கடந்துபோய், மீசியாவுக்கு வந்து, பித்தினியா நாட்டுக்குப் போகப் பிரயத்தனம்பண்ணினார்கள்; ஆவியானவரோ அவர்களைப் போகவொட்டவில்லை.
விளக்கம்:
பவுல் போன்ற பெரிய ஊழியர்கள் ஒரு இடத்திற்கு ஊழியத்திற்குப் போக நினைத்தபோதும், ஆவியானவர் அதைத் தடுத்தார். எனவே, ஊழியம் என்பது நம் திட்டப்படியல்ல, ஆவியானவரின் திட்டப்படி அமைவதே.

4. சுய ஞானத்தின் ஆபத்து
நம்முடைய சொந்த புத்தி அல்லது மனதின் எண்ணங்களை நம்பி ஊழியம் செய்வது ஆபத்தானது.
நீதிமொழிகள் 3:5-6 – "உன் சுயபுத்தியின்மேல் சாயாமல், உன் முழு இருதயத்தோடும் கர்த்தரில் நம்பிக்கையாய் இரு. உன் வழிகளிலெல்லாம் அவரை அறிந்துகொள், அப்பொழுது அவர் உன் பாதைகளைச் செவ்வைப்படுத்துவார்."
நீதிமொழிகள் 14:12 – "மனுஷனுக்குச் செம்மையாய்த் தோன்றுகிற வழியுண்டு; அதின் முடிவோ மரண வழிகள்."
விளக்கம்: ஊழியத்தில் நமக்குச் சரியென்று தோன்றுவது தவறாக முடியலாம். எனவே தேவனை முன்வைப்பதே முக்கியம்.

5. இறுதிநாளின் எச்சரிக்கை
தேவனுடைய சித்தமில்லாமல் நம் சொந்த விருப்பத்தில் "ஊழியம்" என்று பல காரியங்களைச் செய்வதால் பலனில்லை.
மத்தேயு 7:21-23 – "பரலோகத்திலிருக்கிற என் பிதாவின் சித்தத்தின்படி செய்கிறவனே பரலோகராஜ்யத்தில் பிரவேசிப்பானே அல்லாமல், என்னை நோக்கி: கர்த்தாவே! கர்த்தாவே! என்று சொல்லுகிறவன் எல்லாரும் பிரவேசிப்பதில்லை. அந்நாளில் அநேகர் என்னை நோக்கி: கர்த்தாவே! கர்த்தாவே! உமது நாமத்தினாலே தீர்க்கதரிசனம் உரைத்தோம் அல்லவா? ... அப்பொழுது, நான் ஒருக்காலும் உங்களை அறியவில்லை; அக்கிரமச் செய்கைக்காரரே, என்னைவிட்டு அகன்றுபோங்கள் என்று அவர்களுக்குப் பகிரங்கமாய் சொல்லுவேன்."
விளக்கம்: கர்த்தருடைய நாமத்தில் தீர்க்கதரிசனம் சொல்வது, அற்புதம் செய்வது கூட பிதாவின் சித்தத்தின்படி செய்யாவிட்டால் அது அக்கிரமச் செய்கையாகவே கருதப்படும்.
சுருக்கம்
கிறிஸ்தவ ஊழியம் என்பது நம்முடைய கற்பனை அல்லது மனவிருப்பத்தை நிறைவேற்றுவதல்ல. மாறாக:

விவிலிய வார்த்தைக்குக் கீழ்ப்படிவது.

ஜெபத்தின் மூலம் தேவனுடைய சித்தத்தைக் கண்டறிவது.

பரிசுத்த ஆவியானவரின் ஏவுதலின்படி செயல்படுவது.

நல்லது கர்த்தர் உங்களை ஆசீர்வதிப்பாராக ஆமென்.
கிறிஸ்துவின் பணியில் சகோதரன் சிலுவை ராஜா
9841711591.