உன் மாம்சத்தை பாவத்துக்குள்ளாக்க உன் வாய்க்கு இடங்கொடாதே

வார்த்தைகளில் எச்சரிக்கை:

கையின் கிரியைகளைக் காத்துக்கொள்ளுதல்
முன்னுரை:
நமது அன்றாட வாழ்க்கையில் நாம் செய்கிற ஜெபங்கள், எடுக்கிற முயற்சிகள், செய்கிற வேலைகள் மற்றும் ஊழியங்கள் என அனைத்தும் ஆசீர்வதிக்கப்பட வேண்டும் என்பதே நம் ஒவ்வொருவருடைய விருப்பமாகும். ஆனால், வேதாகமம் நமக்கு ஒரு அதிர்ச்சியூட்டும் எச்சரிக்கையைத் தருகிறது. நாம் படுகிற பிரயாசங்கள், கைகளின் கிரியைகள் அனைத்தையும் நம்முடைய சொந்த வார்த்தைகளே அழித்துப் போடும் வல்லமை கொண்டவை.
பிரசங்கி 5:6-ல் ஞானியாகிய சாலொமோன் இவ்விதம் எச்சரிக்கிறார்: "தேவன் உன் வார்த்தைகளினாலே கோபங்கொண்டு, உன் கைகளின் கிரியையை அழிப்பானேன்?"
நாம் தேவனுக்கு முன்பாக அவசரமாகப் பேசும் வார்த்தைகள், முறுமுறுப்புகள், சாக்குப்போக்குகள் மற்றும் கீழ்ப்படியாமையின் வார்த்தைகள் தேவனுடைய கோபத்தைக் கிளப்பி, நாம் அதுவரை கட்டியெழுப்பிய ஆசீர்வாதங்களையும், நம் கையின் பிரயாசத்தின் பலன்களையும் நிர்மூலமாக்கிவிடும். தேவன் நம்மை ஆசீர்வதிக்க விரும்பினாலும், நம்முடைய நாவின் தவறான பிரயோகம் அந்த ஆசீர்வாதங்களைத் தடுத்துவிடுகிறது.
மனிதன் தன் வார்த்தையினால் எப்படி தேவனுடைய கோபத்திற்கு ஆளாகிறான், யாருடைய கைகளின் கிரியைகளை கர்த்தர் இவ்விதம் அழித்துப் போட்டார் என்பதை முழு வேதாகமத்தில் உள்ள வரலாற்றுச் சான்றுகளோடு நாம் ஆராய்ந்து பார்க்கப் போகிறோம். விசுவாசிகளாகிய நாம் நம்முடைய வார்த்தைகளிலும், தேவனுக்குச் செய்யும் பொருத்தனைகளிலும் எவ்வளவு எச்சரிக்கையாக இருக்க வேண்டும் என்பதை இந்த தியானத்தில் சிந்திப்போம்.

1. சவுல் ராஜா (முதல் சாமுவேல் 13 & 15)
விளக்கம்:
சவுல் தேவனுடைய கட்டளைக்குக் கீழ்ப்படியாமல், சாமுவேல் தீர்க்கதரிசி வருவதற்கு முன்பே தானே பலியிட்டான். பின்னர் அமலேக்கியரை அழிக்கும்போது சிறந்த ஆடுமாடுகளை அழிக்காமல் விட்டுவிட்டு, "ஜனங்கள் பலியிடக் கொண்டுவந்தார்கள்" என்று வார்த்தைகளினால் சாக்குப்போக்கு கூறினான்.
அழிந்த கிரியை: அவனுடைய ராஜ்யபாரம் நிலைத்திருக்கவில்லை. கர்த்தர் அவனை ராஜாவாய் இராதபடிக்குத் தள்ளி, அவனுடைய கையின் கிரியைகளை அழித்தார்.
போதிக்கும் முறை: விசுவாசிகளுக்குப் பகுதி கீழ்ப்படிதல் என்பது முழுமையான கீழ்ப்படியாமைக்குச் சமம் என்றும், தவறுகளுக்குச் சாக்குப்போக்கு சொல்லாமல் உண்மையாக அறிக்கை செய்ய வேண்டும் என்றும் போதிக்க வேண்டும்.
வசன ஆதாரம்: "கர்த்தருடைய சத்தத்திற்குக் கீழ்ப்படிகிறதைப்பார்க்கிலும், சர்வாங்க தகனபலிகளும் சமாதானபலிகளும் கர்த்தருக்குப் பிரியமாயிருக்குமோ? பலியைப்பார்க்கிலும் கீழ்ப்படிதலும், ஆட்டுக்கடாக்களின் கொழுப்பைப்பார்க்கிலும் செவிக்கொடுத்தலும் உத்தமம்." (1 சாமுவேல் 15:22).

2. மோசேயும் ஆரோனும் (எண்ணாக 20:7-12)
விளக்கம்:
இஸ்ரவேல் ஜனங்கள் கலகம் செய்தபோது, மோசே கோபமடைந்து, கர்த்தர் சொன்னபடி கன்மலையைப் பார்த்துப் பேசாமல், தன் கோலினால் அதை இரண்டு முறை அடித்தான். அவனுடைய வார்த்தையிலும் செயலிலும் தேவனுடைய பரிசுத்தம் வெளிப்படவில்லை.
அழிந்த கிரியை: வனாந்தரத்தில் 40 ஆண்டுகள் அவன் பட்ட பிரயாசத்தின் இறுதிப் பலனான கானான் தேசத்திற்குள் நுழையும் பாக்கியத்தை அவன் இழந்தான்.
போதிக்கும் முறை: தலைவர்கள் மற்றும் விசுவாசிகள் எவ்வளவு பெரிய ஊழியங்களைச் செய்திருந்தாலும், கோபத்தில் பேசும் வார்த்தைகள் ஒட்டுமொத்த பிரயாசத்தையும் பாதிக்கும் என்பதை விளக்க வேண்டும்.
வசன ஆதாரம்: "கர்த்தர் மோசேயையும் ஆரோனையும் நோக்கி: இஸ்ரவேல் புத்திரரின் கண்களுக்கு முன்பாக என்னைப் பரிசுத்தம்பண்ணும்படி, நீங்கள் என்னை விசுவாசியாமற்போனபடியினால், இந்தச் சபையாருக்கு நான் கொடுத்த தேசத்துக்குள் நீங்கள் அவர்களைக் கொண்டுபோவதில்லை என்றார்." (எண்ணா 20:12).

3. அனனியா மற்றும் சப்பீராள்     (அப்போஸ் 5:1-11)

விளக்கம்:
இவர்கள் தங்கள் நிலத்தை விற்று, அதின் கிரயத்தில் ஒரு பங்கைத் தங்களுக்காக மறைத்து வைத்துவிட்டு, முழுத்தொகையையும் கொடுத்துவிட்டதாக அப்போஸ்தலர்களிடம் பொய் கூறினார்கள்.
அழிந்த கிரியை: அவர்கள் சேர்த்த சொத்து, கௌரவம் மற்றும் அவர்களுடைய ஜீவன் என அனைத்தும் ஒரே நாளில் அழிந்தது.
போதிக்கும் முறை: தேவனுக்கும் சபைக்கும் கொடுக்கும் காரியங்களில் மாய்மாலம் செய்யக்கூடாது என்றும், பரிசுத்த ஆவியானவரிடத்தில் பொய் சொல்வது கைகளின் கிரியைகளை மாத்திரமல்ல, ஜீவனையுமே அழித்துவிடும் என்றும் எச்சரிக்க வேண்டும்.
வசன ஆதாரம்: "பேதுரு அவனை நோக்கி: நிலத்தின் கிரயத்தில் ஒரு பங்கை மறைத்துவைத்து, பரிசுத்த ஆவியினிடத்தில் பொய் சொல்லும்படி, சாத்தான் உன் இருதயத்தை ஏவினதென்ன?" (அப்போஸ் 5:3).

4. யெப்தா  (நியாயாதி 11:30-40)

விளக்கம்:
யெப்தா யுத்தத்திற்குப் போகும்போது சிந்தித்துப் பேசாமல், "நான் ஜெயத்தோடு திரும்பிவரும்போது, என் வீட்டு வாசலிலிருந்து எனக்கு எதிர்கொண்டு வருவது எதுவோ அது கர்த்தருக்குரியதாகும்" என்று ஒரு அவசரமான பொருத்தனையை வார்த்தையினால் செய்தான்.
அழிந்த கிரியை: அவனுக்கு எதிர்கொண்டு வந்தது அவனுடைய ஒரே மகளாகிய கன்னிப் பெண். தன் அவசர வார்த்தையினால் தன் வம்சத்தின் எதிர்காலத்தையே அவன் இழக்க நேரிட்டது.
போதிக்கும் முறை: தேவனிடத்தில் பொருத்தனை செய்யும்போது உணர்ச்சிவசப்பட்டு அவசரமாக வார்த்தைகளை விடக்கூடாது; யோசித்துப் பேச வேண்டும் என்று பிரசங்கி 5:6-ன் நேரடிப் பின்னணியை விளக்க வேண்டும்.
வசன ஆதாரம்: "அப்பொழுது யெப்தா கர்த்தருக்கு ஒரு பொருத்தனை பண்ணி:... நான் சமாதானத்தோடே திரும்பிவரும்போது, என் வீட்டு வாசற்படியிலிருந்து எனக்கு எதிர்கொண்டுவருவது எதுவோ, அது கர்த்தருக்குரியதாகும்..." (நியா 11:30-31).

5. கேயாசி
(2 இராஜா 5:20-27)
விளக்கம்:
எலிசா தீர்க்கதரிசி நாகமானிடமிருந்து எந்தப் பொருளையும் வாங்காதிருந்தும், அவனுடைய வேலைக்காரனாகிய கேயாசி பேராசைப்பட்டு, எலிசாவுக்குத் தெரியாமல் ஓடிச்சென்று, பொய் வார்த்தைகளைச் சொல்லி நாகமானிடம் வெள்ளியையும் ஆடைகளையும் வாங்கினான்.
அழிந்த கிரியை: எலிசாவின் தீர்க்கதரிசன அபிஷேகத்தைப் பெற்றுக்கொள்ள வேண்டிய அவனுடைய எதிர்கால ஊழியக் கிரியைகள் அழிந்து, அவனும் அவனுடைய சந்ததியும் குஷ்டரோகிகளாயினர்.
போதிக்கும் முறை: பேராசையினால் சொல்லப்படும் பொய் வார்த்தைகள் கைகளின் பிரயாச சாபமாக மாறும் என்பதை விசுவாசிகளுக்குப் போதிக்க வேண்டும்.
வசன ஆதாரம்: "நாகமானுடைய குஷ்டரோகம் உன்னையும் உன் சந்ததியையும் என்றென்றைக்கும் பிடித்துக்கொள்ளும் என்றான். உடனே அவன் உறைந்த பனியைப்போல குஷ்டரோகியாகி, அவனுடைய சமுகத்தை விட்டுப் போனான்."
(2 இராஜா 5:27).

6. வனாந்தரத்து இஸ்ரவேல் ஜனங்கள் 

(எண்ணா 14)
விளக்கம்:
கானான் தேசத்தை உளவுபார்த்து வந்த 10 வேவுகாரர்களின் அவிசுவாச வார்த்தைகளைக் கேட்டு, ஒட்டுமொத்த ஜனங்களும் கர்த்தருக்கு விரோதமாக முறுமுறுத்து, "நாங்கள் எகிப்திலேயே மடிந்திருக்கலாம்" என்று எதிர்மறையாகப் பேசினார்கள்.
அழிந்த கிரியை: அவர்கள் பேசிய வார்த்தைகளின்படியே, வனாந்தரத்திலிருந்து கானானை நோக்கி அவர்கள் எடுத்த பயணத்தின் பிரயாசங்கள் அழிந்து, யோசுவா, காலேப் தவிர மற்ற அனைவரும் வனாந்தரத்திலேயே மடிந்தனர்.
போதிக்கும் முறை: நம்முடைய வாயின் வார்த்தைகளை கர்த்தர் கேட்கிறார். அவிசுவாசமும் முறுமுறுப்பும் நிறைந்த வார்த்தைகள் நம்முடைய ஆசீர்வாதங்களை அழித்துவிடும் என்று போதிக்க வேண்டும்.
வசன ஆதாரம்: "நீங்கள் என் காதுகள் கேட்கச் சொன்னபடியே நிச்சயமாக நான் உங்களுக்குச் செய்வேன் என்பதை என் ஜீவனைக்கொண்டு சொல்லுகிறேன் என்று கர்த்தர் உரைக்கிறார் என்று அவர்களோடு சொல்லுங்க " (எண்ணா 14:28).

7. உசியா ராஜா (2 நாளாகமம் 26:16-21)
விளக்கம்:
உசியா ராஜா பலப்பட்டபோது அவனுடைய இருதயம் மேட்டிமைகொண்டது. ஆசாரியர்கள் மாத்திரமே செய்ய வேண்டிய தூபம் காட்டும் பணியைத் தானே செய்ய முற்பட்டான். ஆசாரியர்கள் அதைத் தடுத்தபோது, அவன் அவர்கள் மேல் கோபங்கொண்டு வார்த்தைகளினால் பேசினான்.
அழிந்த கிரியை: அவன் கோபங்கொண்ட அந்தப் பிரயாசத்தின் போதே அவனுடைய நெற்றியில் குஷ்டரோகம் தோன்றியது. அவன் தன் வாழ்நாள் முழுவதும் தனித்திருக்க நேரிட்டது, அவனுடைய ராஜரீகக் கிரியைகள் பாழாயின.
போதிக்கும் முறை: தேவன் நியமித்த எல்லைகளை மீறி, பெருமையோடு செயல்படுவதும் பேசுவதும் கைகளின் கிரியைகளை முற்றிலும் பாழாக்கிவிடும் என்று போதிக்க வேண்டும்.
வசன ஆதாரம்: "ஆசாரியர்மேல் அவன் கோபமாயிருக்கையில், கர்த்தருடைய ஆலயத்திலே தூபபீடத்தின் முன் நிற்க்கிற அவன் நெற்றியில் குஷ்டரோகம் தோன்றிற்று." (2 நாளாகமம் 26:19).

விசுவாசிகளுக்கு இதை எப்படிப் போதிப்பது? (சுருக்கமான வழிகாட்டி):
1)வார்த்தைகளின் வல்லமை:
நம்முடைய நாவு மரணத்திற்கும் ஜீவனுக்கும் ஏதுவான அதிகாரத்தைக் கொண்டுள்ளது (நீதிமொழிகள் 18:21). நாம் பேசும் ஒவ்வொரு வீணான வார்த்தைக்கும் நியாயத்தீர்ப்பு நாளில் கணக்கொப்புவிக்க வேண்டும்.

2)பொருத்தனைகளில் உண்மை:
தேவனுக்கு முன்பாக அவசரமாக வாக்குக் கொடுப்பதோ, பொருத்தனை செய்துவிட்டு அதை நிறைவேற்றாமல் ஏமாற்றுவதோ சாபத்தைக் கொண்டுவரும்.

3)முறுமுறுப்பைத் தவிர்த்தல்: சோதனையான நேரங்களில் தேவனுக்கு விரோதமாகப் பேசாமல், யோபுவைப் போல "கர்த்தர் கொடுத்தார், கர்த்தர் எடுத்தார்; கர்த்தருடைய நாமத்திற்கு ஸ்தோத்திரம்" என்று துதிக்கப் பழக வேண்டும்.

கிறிஸ்துவின் பணியில் சகோதரன் சிலுவை ராஜா
9841711591.