மீட்பின் திட்டத்திற்காக அடிமையாக ஒப்புக்கொடுத்த மரியாள்.

தேவனுடைய மீட்பின் திட்டத்தில் தன்னை ஒரு கருவியாக ஒப்புக்கொடுத்த மரியாள், "நான் ஆண்டவருக்கு அடிமை" என்று சொன்னபோது, அது வெறும் வார்த்தையல்ல; அது தன் உயிர், கௌரவம் மற்றும் எதிர்காலத்தைப் பணயம் வைத்த ஒரு மாபெரும் விசுவாச அறிக்கை. பழைய ஏற்பாட்டு நியாயப்பிரமாணங்களின்படி கல்லெறியப்படும் மரண தண்டனை, சமூகப் புறக்கணிப்பு மற்றும் வறுமை போன்ற சவால்கள் காத்திருந்த போதிலும், அவற்றைப் பொருட்படுத்தாமல் தேவ சித்தத்திற்குப் பணிந்த அவளது கீழ்ப்படிதல், ஒவ்வொரு விசுவாசிக்கும் ஒரு உன்னதமான பாடமாகும்.

1. விபச்சாரக் குற்றம் மற்றும் மரண தண்டனை (உபாகமம் 22:23-24):

மரியாள் யோசேப்புக்கு நியமிக்கப்பட்டவளாய் இருந்தபோது, அவர்கள் கூடி வருமுன்னே அவள் கருவுற்றாள். பழைய ஏற்பாட்டு சட்டப்படி, நியமிக்கப்பட்ட பெண் வேறொருவரால் கருவுற்றால் அவள் விபச்சாரி என கருதப்பட்டு, ஊர் வாசலில் கல்லெறிந்து கொல்லப்பட வேண்டும். இந்த மரண பயத்தை மீறி "நான் ஆண்டவருக்கு அடிமை" என்று அவள் ஒப்புக்கொடுத்தாள் (லூக்கா 1:38). 

நிச்சயிக்கப்பட்ட பெண் மீதான சட்டம் (உபாகமம் 22:23-24):

மரியாளின் நிலைக்கு மிகவும் நெருக்கமான சட்டம் இதுவே. ஒரு கன்னிப்பெண் ஒருவனுக்கு நிச்சயிக்கப்பட்டு (Betrothed), அவள் வேறொருவனுடன் உறவு கொண்டால், அவர்கள் இருவரும் அந்தப் பட்டணத்து வாசலுக்குக் கொண்டு வரப்பட்டு, கல்லெறிந்து கொல்லப்பட வேண்டும். அந்தப் பெண் உதவிக்காகக் கூக்குரலிடாததே அவள் சம்மதித்ததற்கான அடையாளமாகக் கருதப்பட்டது.

பொதுவான விபச்சாரத் தண்டனை 

(லேவிய 20:10):

"பிறனுடைய மனைவியோடு விபசாரம் செய்கிறவன் எவனோ... விபசாரஞ் செய்த அந்தப் புருஷனும் அந்த ஸ்திரீயும் நிச்சயமாய்க் கொலைசெய்யப்படக்கடவர்கள்" என்று வேதம் கூறுகிறது.

கற்புடைமை நிரூபிக்கப்படாவிட்டால் (உபாகமம் 22:20-21):

ஒரு பெண்ணின் திருமணத்திற்குப் பிறகு அவளது கன்னிமை அல்லது கற்பு குறித்த சந்தேகம் எழுந்து, அது பொய்யாக இருக்கும்பட்சத்தில், அவளை அவள் தகப்பன் வீட்டு வாசலில் வைத்து ஊர் ஜனங்கள் கல்லால் அடித்துக் கொல்ல வேண்டும்.

ஏன் இந்தத் தண்டனை?

"இப்படியே தீமையை உன் நடுவிலிருந்து விலக்கக்கடவாய்" என்பதே இந்தச் சட்டங்களின் நோக்கமாக இருந்தது. அதாவது, ஒரு தனிநபரின் பாவம் முழுச் சமுதாயத்தையும் தீட்டுப்படுத்தக் கூடாது என்பதற்காக இத்தகைய கடுமையான தண்டனைகள் வழங்கப்பட்டன.

மரியாளின் நிலை:

மரியாள் யோசேப்புக்கு நிச்சயிக்கப்பட்டிருந்ததால், அவள் திருமணத்திற்கு முன்பே கருவுற்றது யூத முறைப்படி விபச்சாரக் குற்றமாகவே பார்க்கப்பட்டது. யோசேப்பு அவளைப் பகிரங்கமாக அவமானப்படுத்தாமல் ரகசியமாகத் தள்ளிவிட எண்ணியது, அவளை இந்த கல்லெறிந்து கொல்லும் தண்டனையிலிருந்து காப்பாற்றவே ஆகும் (மத்தேயு 1:19). 

மரியாளின் ஒப்புக்கொடுத்தல் என்பது, இந்தச் சட்டத்தின்படி தான் கொல்லப்படக்கூடும் என்பதையும், தன் குடும்பத்தின் கௌரவம் அழியும் என்பதையும் முழுமையாக உணர்ந்து, தேவனுடைய வார்த்தைக்குக் கீழ்ப்படிந்த ஒரு பெரும் தியாகமாகும்.

 

2. பகிரங்கமான அவமானம் 

(மத்தேயு 1:19):

யோசேப்பு நீதியுள்ளவனாய் இருந்ததால் அவளைப் "பகிரங்கமாய் அவமானப்படுத்த" விரும்பவில்லை என்று வேதம் கூறுகிறது. அதாவது, ஒரு பெண் திருமணத்திற்கு முன் கருவுறுவது அன்றைய யூத சமூகத்தில் மிகப்பெரிய அவமானம். சமுதாயத்தின் ஏளனப் பேச்சுகளையும், ஒதுக்கிவைதலையும் ஏற்க அவள் துணிந்தாள்.

(1). "பகிரங்கப்படுத்துதல்" என்பதன் அர்த்தம் 

(மத்தேயு 1:19):

வேதத்தில் யோசேப்பு அவளை "பகிரங்கமாய் அவமானப்படுத்த (Make her a public example) மனதில்லாமல்" என்று வாசிக்கிறோம். இதற்கு கிரேக்க மூல மொழியில் 'deigmatisai' என்று பெயர். அதாவது, ஒரு குற்றவாளியைப் பொதுவெளியில் நிறுத்தி, அவளது பாவத்தை ஊர் அறியச் செய்து, அவளைச் சிறுமைப்படுத்துவதாகும். மரியாளுக்கு இது நேர்ந்திருந்தால், அவள் வாழ்நாள் முழுவதும் ஒரு விபச்சாரி என்ற முத்திரையோடு வாழ வேண்டியிருந்திருக்கும்.

(2). ஊர் சபையில் விசாரணை (எண்ணா 5:11-31):

பழைய ஏற்பாட்டு முறைப்படி, ஒரு பெண் மீது சந்தேகம் எழுந்தால், அவள் ஆசாரியனிடம் அழைத்துச் செல்லப்பட வேண்டும். அங்கே அவள் "சாபத்தைக் கொண்டுவரும் கசப்பான தண்ணீர்" (Bitter water that brings a curse) குடிக்க வைக்கப்படுவாள். அவள் பாவம் செய்திருந்தால் அவள் உடல் வீங்கி, பெரும் அவமானத்திற்கு உள்ளாவாள். மரியாள் தான் ஒரு கன்னிகை என்பதை நிரூபிக்க இத்தகைய சோதனைகளைச் சந்திக்க நேரிடும் என்ற சூழல் இருந்தது.

(3). குடும்ப கௌரவம் பறிபோதல்:

யூத முறைப்படி ஒரு பெண்ணின் கற்பு அவளது தந்தையின் வீட்டின் கௌரவமாகக் கருதப்பட்டது (உபாகமம் 22:21). மரியாள் கருவுற்ற செய்தி வெளியே தெரிந்தால், அது அவளை மட்டுமல்ல, அவளது தந்தை மற்றும் உறவினர்கள் அனைவரையும் சமூகத்திலிருந்து ஒதுக்கி வைக்கக் காரணமாகும்.

(4). விவாகரத்து கடிதம் (Deed of Divorce):

யோசேப்பு மரியாளை ரகசியமாகத் தள்ளிவிட நினைத்தது அவளைக் காப்பாற்றத்தான். ஆனால் ஒரு பெண் திருமணத்திற்கு முன்பே தள்ளிவிடப்பட்டால், அவள் ஏன் தள்ளிவிடப்பட்டாள் என்ற கேள்விக்கு வாழ்நாள் முழுவதும் பதில் சொல்ல வேண்டியிருக்கும். இது அவளுக்கு ஒரு சமூக ரீதியான "மரணத்திற்கு" சமமான அவமானம்.

(5). லூக்கா 1:25 - "மனுஷருக்குள்ளே எனக்கு இருந்த நிந்தையை":

எலிசபெத் தான் கருவுற்றபோது, "மனுஷருக்குள்ளே எனக்கு இருந்த நிந்தையை நீக்க" தேவன் இதைக் கட்டளையிட்டார் என்று கூறுகிறாள். எலிசபெத்துக்குப் பிள்ளை இல்லாதது நிந்தையாக இருந்தது என்றால், மரியாளுக்குத் திருமணத்திற்கு முன் கருவுற்றது அதைவிடப் பெரிய நிந்தையாக (Reproach) மாறவிருந்தது.

(6). நியாயப்பிரமாணத்தின் பழிவாங்குதல்:

பழைய ஏற்பாட்டில் ஒருவன் தன் மனைவியின் கற்பின் மேல் சந்தேகப்பட்டால், அவன் அவள் மேல் "பொறாமை" கொண்டு அவளைச் சபையின் முன் நிறுத்துவான். இந்தச் சட்ட ரீதியான அவமானங்களை ஏற்க மரியாள் "ஆண்டவருக்கு அடிமை" என்று தன்னைத் தாழ்த்தினாள்.

(7). இயேசுவின் மீதான பிற்கால நிந்தனை 

(யோவான் 8:41):

மரியாளின் இந்தச் சூழ்நிலையை யூதர்கள் இயேசுவின் ஊழியக் காலத்திலும் குத்திக்காட்டினார்கள். "நாங்கள் விபச்சாரத்தினால் பிறந்தவர்களல்ல" என்று அவர்கள் இயேசுவிடம் சொன்னபோது, மறைமுகமாக மரியாளின் கர்ப்பத்தைப் பற்றி அவதூறு பேசினார்கள். இந்த நிந்தனை மரியாளை வாழ்நாள் முழுவதும் துரத்தியது.

மரியாள் இந்த அவமானத்தை விட தேவனுடைய திட்டமே மேலானது என்று கருதினாள்.

3. கணவனால் கைவிடப்படும் நிலை (மத்தேயு 1:19):

பழைய ஏற்பாட்டு முறைப்படி, மரியாளை ரகசியமாகத் தள்ளிவிட யோசேப்பு எண்ணினான். ஒரு ஆதரவற்ற விதவை அல்லது கைவிடப்பட்ட பெண்ணின் நிலை அன்றைய காலத்தில் மிகவும் பரிதாபகரமானது. தன் எதிர்கால வாழ்க்கை, பாதுகாப்பு அனைத்தையும் பணயம் வைத்து அவள் தேவ சித்தத்திற்கு இணங்கினாள்.

மரியாள் "கணவனால் கைவிடப்படும் நிலை" குறித்து, அன்றைய யூத திருமண சட்டம்

(1).நிச்சயதார்த்தத்தின் பிணைப்பு (மத்தேயு 1:18): 

யூத முறைப்படி 'நிச்சயதார்த்தம்' (Betrothal) என்பது இன்றைய காலத்தை விட வலிமையானது. நிச்சயிக்கப்பட்ட உடனேயே அவர்கள் சட்டப்பூர்வமாக தம்பதிகளாகக் கருதப்பட்டனர். ஆனால், அவர்கள் ஒன்றாகக் கூடி வாழ இன்னும் காலம் இருந்தது. இந்த இடைவெளியில் மரியாள் கர்ப்பவதியானதால், யோசேப்பு அவளைக் கைவிடுவது என்பது ஒரு சாதாரணப் பிரிவல்ல, அது ஒரு 'விவாகரத்து' (Divorce) ஆகும்.

(2).நியாயப்பிரமாணத்தின் கட்டளை (உபாகமம் 24:1): பழைய ஏற்பாட்டுச் சட்டப்படி, ஒரு புருஷன் தன் மனைவியினிடத்தில் "ஏதாவது இலச்சையான காரியத்தைக் கண்டால்" அவளுக்குத் தள்ளுதூதலை (விவாகரத்து கடிதம்) கொடுத்து அனுப்பிவிடலாம். மரியாள் கர்ப்பமாயிருந்தது யோசேப்பின் பார்வையில் அத்தகைய ஒரு காரியமாகத் தெரிந்திருக்கலாம்.

(3).ஆதரவற்ற நிலை: ஒரு பெண் கணவனால் அல்லது நிச்சயிக்கப்பட்டவனால் தள்ளப்பட்டால், அவளுக்குச் சமூகப் பாதுகாப்பு இருக்காது. பழைய ஏற்பாட்டுச் சமூகத்தில் கைவிடப்பட்ட பெண் தன் தகப்பன் வீட்டிற்குத் திரும்ப வேண்டும். ஆனால், கர்ப்பிணியாகத் திரும்பும்போது அவளைத் தந்தை வீடும் ஏற்காது, சமுதாயமும் ஏற்காது. இது அவளை ஒரு பிச்சைக்காரி அல்லது அடிமை நிலைக்குத் தள்ளக்கூடிய சூழல்.

(4).பொருளாதார நெருக்கடி: அக்காலத்துச் சட்டங்களின்படி, ஒரு பெண் விவாகரத்து செய்யப்பட்டால் அவளது 'ஸ்திரீதனம்' (Ketubah) அவளுக்கு வழங்கப்பட வேண்டும். ஆனால் விபச்சாரக் குற்றச்சாட்டின் கீழ் தள்ளப்பட்டால், அவளுக்கு எந்தப் பொருளாதார இழப்பீடும் கிடைக்காது. மரியாள் முற்றிலும் வறிய நிலையை ஏற்கத் துணிந்தாள்.

(5).தனிமைப்படுத்தப்படுதல் (Isolaton): நியாயப்பிரமாணத்தின்படி "தீட்டு" உள்ளவர்கள் சபையை விட்டு விலக்கி வைக்கப்பட்டனர். கணவன் கைவிடும்போது, அவள் தேவாலய வழிபாடுகளிலிருந்தும், பண்டிகைகளிலிருந்தும் ஒதுக்கி வைக்கப்படும் அபாயம் இருந்தது.

(6).இரக்கமுள்ள யோசேப்பின் முடிவு (மத்தேயு 1:19): யோசேப்பு "நீதியுள்ளவனாய்" இருந்ததால் அவளைப் பகிரங்கமாகக் கொலை செய்ய விரும்பாமல், "இரகசியமாய்த் தள்ளிவிட" எண்ணினான். இது மரியாளுக்குக் கொடுக்கப்படும் ஒரு சிறு சலுகையாகத் தெரிந்தாலும், நடைமுறையில் அவளைக் கைக்குழந்தையுடன் சமூகத்தில் திக்கற்றவளாக அலையவிடும் ஒரு கடினமான நிலையாகும்.

(7).தேவனுடைய தலையீடு: 

மரியாள் இந்த 'கைவிடப்படும் நிலையை' மௌனமாக ஏற்றுக்கொண்டாள். அவள் தன்னை நியாயப்படுத்த யோசேப்பிடம் சண்டையிடவில்லை. "ஆண்டவருக்கு அடிமை" என்று தன்னைத் தாழ்த்தியதால், தேவனே ஒரு சொப்பனத்தின் மூலம் யோசேப்பின் முடிவை மாற்றி, அவளுக்குப் பாதுகாப்பான ஒரு குடும்பத்தை உறுதி செய்தார் (மத்தேயு 1:20).

மரியாள் தன் கணவனின் அங்கீகாரத்தை விட, தேவனுடைய அங்கீகாரமே முக்கியம் எனத் துணிந்தாள்.

4. மோசேயின் பிரமாணத்தின்படி சுத்திகரிப்பு பலி (லேவிய 12:2-8):

இயேசுவைப் பெற்றெடுத்த பிறகு, மரியாள் மோசேயின் நியாயப்பிரமாணத்தின்படி தன்னைச் சுத்திகரிக்க தேவாலயத்திற்குச் சென்றாள் (லூக்கா 2:22-24). பாவம் இல்லாதவரைப் பெற்றெடுத்தாலும், ஒரு சாதாரணப் பெண்ணாக நியாயப்பிரமாணத்திற்குக் கீழ்ப்படிந்து, ஏழைகளுக்கான பலியான "ஒரு ஜோடி மாடப்புறாக்களை" ஒப்புக்கொடுத்துத் தன்னைத் தாழ்த்தினாள்.

மரியாள் இயேசுவைப் பெற்றெடுத்த பிறகு, மோசேயின் பிரமாணத்திற்கு எவ்விதம் கீழ்ப்படிதார்.

(1). லேவியராகமச் சட்டம் 

(லேவிய 12:2-4):

பழைய ஏற்பாட்டு நியாயப்பிரமாணத்தின்படி, ஒரு ஸ்திரீ ஆண் பிள்ளையைப் பெற்றெடுத்தால் அவள் ஏழு நாள் தீட்டாயிருப்பாள் என்றும், எட்டாம் நாளில் பிள்ளைக்கு விருத்தசேதனம் செய்யப்பட வேண்டும் என்றும் கூறப்பட்டுள்ளது. அதன்பிறகு அவள் தன் சுத்திகரிப்புக்காக முப்பத்து மூன்று நாள் காத்திருக்க வேண்டும். மரியாள் ஒரு சாதாரணத் தாயைப் போல இந்தச் சட்டங்களுக்குத் தன்னை முழுமையாக உட்படுத்தினாள்.

(2). ஏழைகளுக்கான பலி (லேவிய 12:8):

சுத்திகரிப்பு காலம் முடிந்ததும், ஒரு பெண் ஒரு ஆட்டுக்குட்டியையும், ஒரு புறாக்குஞ்சையும் பலியாகச் செலுத்த வேண்டும். ஆனால், அவளுக்கு ஆட்டுக்குட்டியைச் செலுத்த வசதியில்லாவிட்டால், "இரண்டு காட்டுப்புறாக்களையாவது இரண்டு புறாக்குஞ்சுகளையாவது" கொண்டு வரலாம் என்று வேதம் கூறுகிறது.

(3). மரியாளின் வறுமை நிலை (லூக்கா 2:24):

மரியாள் தேவாலயத்திற்குச் சென்றபோது, ஆட்டுக்குட்டியைச் செலுத்த வசதியற்ற ஏழ்மை நிலையில் இருந்ததால், ஒரு ஜோடி மாடப்புறாக்களையே பலியாகச் செலுத்தினாள். உலகத்தின் பாவத்தைச் சுமந்து தீர்க்கும் "தேவ ஆட்டுக்குட்டியையே" கையில் ஏந்தியிருந்தும், நியாயப்பிரமாணத்தின்படி ஏழைகளுக்கான பலியைச் செலுத்தித் தன் தாழ்மையை வெளிப்படுத்தினாள்.

(4). முதற்பேறானவன் ஆண்டவருக்குப் பரிசுத்தமானவன் (யாத்திரா 13:2, 12):

பழைய ஏற்பாட்டு பிரமாணத்தின்படி, இஸ்ரவேலரில் முதற்பேறான ஆண் பிள்ளைகள் அனைவரும் கர்த்தருக்குப் பிரதிஷ்டை செய்யப்பட வேண்டும். எகிப்தில் சங்கார தூதன் வந்தபோது தலைச்சன் பிள்ளைகளைக் காத்த தேவனுக்கு நன்றியாக இந்தச் சட்டம் இருந்தது. இதன்படி மரியாள் இயேசுவைக் கர்த்தருக்கு என்று அர்ப்பணித்தாள் (லூக்கா 2:22-23).

(5). மீட்பின் விலைப்பொருள் (எண்ணா 18:15-16):

லேவி கோத்திரத்தாரைத் தவிர மற்ற கோத்திரத்தில் பிறக்கும் தலைச்சன் பிள்ளைகளைத் தேவனிடமிருந்து "மீட்டுக்கொள்ள" (Redeem) ஐந்து சேக்கல் பணம் செலுத்த வேண்டும். இயேசு லேவி கோத்திரத்தில் பிறக்காததால், மரியாள் இந்தச் சட்டத்தின்படியும் கீழ்ப்படிந்திருக்க வேண்டும்.

(6). நியாயப்பிரமாணத்திற்குக் கீழ்ப்பட்டவர் (கலாத்தியர் 4:4):

"காலம் நிறைவேறினபோது, ஸ்திரீயினிடத்தில் பிறந்தவரும் நியாயப்பிரமாணத்திற்குக் கீழானவருமாகிய தம்முடைய குமாரனைத் தேவன் அனுப்பினார்" என்று பவுல் கூறுகிறார். மரியாள் தன் கீழ்ப்படிதலின் மூலம், இயேசு நியாயப்பிரமாணத்தை நிறைவேற்றுகிறவராக வளர்வதற்கு அடிப்படை அமைத்துக் கொடுத்தாள்.

(7). ஆசாரிய முறைமைக்குக் கொடுத்த மரியாதை:

மரியாள் தேவாலயத்திற்குச் சென்று தன்னை ஆசாரியனிடம் காண்பித்தது, தான் ஒரு யூதப் பெண்ணாக பழைய ஏற்பாட்டு வழிபாட்டு முறைகளை எவ்வளவு மதித்தார் என்பதைக் காட்டுகிறது. தேவனுடைய தாயாக இருந்தும், தான் ஒரு பாவி என்பதைப் போலச் சுத்திகரிப்புப் பலி செலுத்தியது அவளது மிகுந்த மனத்தாழ்மையின் உச்சமாகும்.

மரியாள் இவ்வாறு நியாயப்பிரமாணத்தைச் சரியாக நிறைவேற்றியபோதுதான், சிமியோன் மற்றும் அன்னாள் போன்ற தீர்க்கதரிசிகளின் ஆசீர்வாதத்தைப் பெற்றாள்.

5. எகிப்திற்கு அகதியாக ஓடுதல் (ஓசியா 11:1, மத்தேயு 2:13-14):

ஏரோது ராஜாவின் கொடூரத்தால், பிறந்த குழந்தையோடு அந்நிய தேசமான எகிப்திற்கு அகதியாக ஓட வேண்டியிருந்தது. பழைய ஏற்பாட்டில் இஸ்ரவேலர் எகிப்தில் அடிமைகளாக இருந்ததை இது நினைவுபடுத்துகிறது. ஒரு இளம் தாயாக, அந்நிய தேசத்தில் பாதுகாப்பு இல்லாத சூழலை நிபந்தனையின்றி ஏற்றுக்கொண்டாள்.

மரியாள் தன் குழந்தையோடு எகிப்திற்கு அகதியாக ஓடியது.

(1).அந்நிய தேசத்தில் தஞ்சம் (மத்தேயு 2:13-14):

தேவதூதனின் எச்சரிக்கையின்படி, யோசேப்பு மரியாளையும் குழந்தையையும் கூட்டிக்கொண்டு இரவோடிரவாக எகிப்திற்குப் புறப்பட்டார். பழைய ஏற்பாட்டில் யாக்கோபின் குடும்பம் பஞ்சத்தினால் எகிப்திற்குத் தஞ்சம் புகுந்ததை இது நினைவுபடுத்துகிறது. ஒரு இளம் தாயாக, தனக்குத் தெரியாத அந்நிய தேசத்திற்குப் பாதுகாப்பு தேடி ஓடும் நிலையை மரியாள் ஏற்றுக்கொண்டாள்.

(2).பழைய ஏற்பாட்டுத் தீர்க்கதரிசனம் (ஓசியா 11:1):

"எகிப்திலிருந்து என் குமாரனை வரவழைத்தேன்" என்று ஓசியா தீர்க்கதரிசி சொன்ன வார்த்தை நிறைவேறும்படி இது நடந்தது (மத்தேயு 2:15). இஸ்ரவேல் ஜனங்கள் எகிப்திலிருந்து விடுதலையானது போல, மேசியாவும் எகிப்திலிருந்து வரவேண்டும் என்ற தேவத் திட்டத்திற்கு மரியாள் ஒத்துழைத்தாள்.

(3).இரண்டாம் மோசே - ஒரு நிழலாட்டம்:

மோசே பிறந்தபோது பார்வோன் ஆண் குழந்தைகளைக் கொல்ல ஆணையிட்டான். அதேபோல் இயேசு பிறந்தபோது ஏரோது குழந்தைகளைக் கொல்ல ஆணையிட்டான். மோசே எகிப்திலிருந்து இஸ்ரவேலரை மீட்டது போல, இயேசு எகிப்திலிருந்து வந்து உலகை மீட்கப் போகிறார் என்ற வரலாற்றுப் பின்னணியில் மரியாள் ஒரு கருவியாகத் திகழ்ந்தாள்.

(4).அகதி வாழ்க்கை (Refugee Life):

தன் சொந்த நாடு, உறவினர்கள், பாதுகாப்பு அனைத்தையும் விட்டுவிட்டு ஒரு அகதியாக வாழ்வது மிகப்பெரிய அவமானம் மற்றும் கஷ்டம். எகிப்து அன்றைய யூதர்களுக்கு அடிமைத்தனத்தின் அடையாளமாக இருந்தது. அங்கே ஒரு ஏழ்மையான சூழலில் வாழ மரியாள் எவ்வித நிபந்தனையும் விதிக்காமல் இணங்கினாள்.

(5).யாத்திராகமத்தின் துயரம் 

(மத்தேயு 2:16-18):

ஏரோது பெத்லகேமில் இருந்த குழந்தைகளைக் கொலை செய்தபோது, "ராமாவிலே புலம்பலும் மகா அழுகையுமாகிய சத்தம் கேட்கப்பட்டது" என்ற எரேமியா 31:15-ன் தீர்க்கதரிசனம் நிறைவேறியது. மரியாளின் கீழ்ப்படிதலால் இயேசு தப்பினாலும், அவளைச் சுற்றியிருந்த பிற தாய்மார்களின் அழுகுரல் அவளுக்குப் பெரும் மனவேதனையைத் தந்திருக்கும்.

(6).ஆண்டவருக்கு அடிமை என்பதன் மெய்ப்பொருள்:

"நான் ஆண்டவருக்கு அடிமை" என்று சொன்ன மரியாள், தேவன் காட்டிய இடத்திற்கு (எகிப்து) எப்போது வேண்டுமானாலும் இடம்பெயரத் தயாராக இருந்தாள். ஒரு அடிமைக்குத் தங்குமிடம் பற்றிய சொந்த விருப்பம் கிடையாது என்பதை அவள் தன் வாழ்க்கையில் நிரூபித்தாள்.

(7).பாதுகாப்பு அற்ற பயணம்:

அக்காலத்தில் இஸ்ரவேலில் இருந்து எகிப்திற்குச் செல்லும் பாதை வனாந்தரங்கள் நிறைந்தது, கள்ளர் பயம் அதிகம் உள்ளது. கையில் ஒரு சிறு குழந்தையை வைத்துக்கொண்டு, எந்த வசதியும் இல்லாமல் நீண்ட தூரம் பயணம் செய்த அந்தத் துணிச்சல் மரியாளின் விசுவாசத்தைக் காட்டுகிறது.

மரியாள் இவ்வாறு எகிப்திற்குச் சென்றது, பின்னாளில் இயேசு நியாயப்பிரமாணத்தின் அடிமைத்தனத்திலிருந்து நம்மை மீட்பதற்கான ஒரு அடையாளமாக அமைந்தது.

6. இதயத்தை ஊடுருவும் துக்கம் (லூக்கா 2:34-35):

சிமியோன் மரியாளை நோக்கி: "உன் ஆத்துமாவையும் ஒரு பட்டயம் உருவிப்போகும்" என்று தீர்க்கதரிசனமாகச் சொன்னார். அதாவது, மேசியாவைப் பெற்றெடுப்பது வெறும் மகிழ்ச்சி மட்டுமல்ல, சிலுவை மரணத்தைக் கண்டு துடிக்கும் தாயின் வேதனையையும் உள்ளடக்கியது என்பதை அவள் முன்கூட்டியே அறிந்து அதை ஏற்றுக்கொண்டாள்.

மரியாள் "இதயத்தை ஊடுருவும் துக்கம்" 

(1).சிமியோனின் தீர்க்கதரிசனம் (லூக்கா 2:34-35):

இயேசுவை தேவாலயத்தில் அர்ப்பணித்தபோது, சிமியோன் மரியாளை நோக்கி: "உன் ஆத்துமாவையும் ஒரு பட்டயம் உருவிப்போகும்" என்றார். இது ஒரு சாதாரண எச்சரிக்கை அல்ல; மேசியாவைப் பெற்றெடுப்பதற்கான விலையாக அவள் ஒரு தாயாக அனுபவிக்கப்போகும் தாங்கொணா துயரத்தைக் குறித்த முன் அறிவிப்பு.

(2).பழைய ஏற்பாட்டு 'துக்கங்களின் மனுஷன்' (ஏசாயா 53:3):

ஏசாயா தீர்க்கதரிசி மேசியாவை "துக்கமனுஷனும் பாடு அநுபவித்தவனுமாய்" சித்தரிக்கிறார். தன் மகன் இத்தகைய பாடுகளை அனுபவிக்கப்போகிறான் என்பதை அறிந்திருந்தும், அதற்குத் தன்னையே ஒப்புக்கொடுத்த மரியாளின் உள்ளம் அன்றே துக்கத்தினால் ஊடுருவப்பட்டது.

(3).சிலுவை அடியில் நின்ற துயரம் (யோவான் 19:25):

பட்டயம் ஆத்துமாவை உருவுவது என்பது இயேசு சிலுவையில் தொங்கும்போது மரியாள் அருகில் நின்று பார்த்தபோது உச்சமடைந்தது. பழைய ஏற்பாட்டில் ஆபிரகாம் தன் மகனைப் பலியிடச் சென்றபோது இருந்த அதே இதய வேதனையை (ஆதியாகமம் 22), மரியாள் கல்வாரியில் நிஜமாகவே அனுபவித்தாள்.

(4).சமூகத் தீர்ப்பின் வலி:

மரியாளின் துக்கம் என்பது தனிப்பட்டது மட்டுமல்ல; சமூகத்தின் பார்வையில் ஒரு 'பாவியாக' அல்லது 'ஒழுக்கமற்றவளாக' ஆரம்பத்தில் கருதப்பட்ட அந்த மனக்காயம் அவளது வாழ்நாள் முழுவதும் ஒரு ஆறாத வடுவாக இருந்திருக்கலாம்.

(5).தாயின் தியாகம் (யாத்தி 2:1-10):

மோசேயின் தாய் தன் பிள்ளையைக் காப்பாற்ற ஒரு பெட்டியில் வைத்து ஆற்றில் விட்டபோது அடைந்த அதே பதற்றத்தையும் துக்கத்தையும், மரியாள் எகிப்திற்கு ஓடும்போதும், இயேசுவை ஜனங்கள் கல்லெறியத் தேடும்போதும் அனுபவித்தாள்.

(6).இழந்த பிள்ளையின் வேதனை 

(எரேமியா 31:15):

ராகேல் தன் பிள்ளைகளுக்காகப் புலம்பி ஆறுதலடையாதிருந்தாள் என்ற எரேமியாவின் தீர்க்கதரிசனம், பெத்லகேம் குழந்தைகளின் கொலை மூலம் நிறைவேறியது. அந்தத் தாய்மார்களின் அழுகுரல் மரியாளின் இதயத்தையும் கனக்கச் செய்திருக்கும்.

(7).நிபந்தனையற்ற ஒப்புக்கொடுத்தல்:

"ஆண்டவருக்கு அடிமை" என்று அவள் சொன்னபோது, அது மகிழ்ச்சியை மட்டுமல்ல, அந்தப் பட்டயத்தையும் (துக்கத்தையும்) சேர்த்தே ஏற்றுக்கொண்ட சம்மதம். தேவன் அவளுக்குக் கொடுத்த மகிமைக்கு ஈடாக, அவள் உலகம் காணாத துயரத்தைச் சுமக்க வேண்டியிருந்தது.

மரியாள் இந்தத் துக்கத்தை ஏற்றுக்கொண்டதால்தான், மீட்பின் திட்டம் நிறைவேற முடிந்தது.

7. வறுமையும் எளிமையும் 

(லூக்கா 2:7):

அனைத்துச் சொத்துக்களுக்கும் உரியவரைப் பெற்றெடுக்க அவளுக்குச் சத்திரத்தில் இடமில்லை. தீர்க்கதரிசனங்களின்படி ஒரு ராஜாவாக வரவேண்டியவரை, மாட்டுத் தொழுவத்தில் முன்னணையில் கிடத்த வேண்டிய வறுமையை அவள் முறுமுறுக்காமல் ஏற்றாள். இது "தாழ்மையுள்ளவர்களை உயர்த்துகிறார்" (லூக்கா 1:52) என்ற அவளது பாடலின் பிரதிபலிப்பாக இருந்தது.

மரியாளின் அர்ப்பணிப்பு என்பது வெறும் சம்மதம் மட்டுமல்ல, அது மரணம் மற்றும் அவமானத்தின் விளிம்பில் நின்று எடுக்கப்பட்ட ஒரு துணிச்சலான விசுவாச முடிவு.

மரியாள் இயேசுவைப் பெற்றெடுத்தபோது சந்தித்த "வறுமையும் எளிமையும்" 

(1).சத்திரத்தில் இடமில்லாத நிலை (லூக்கா 2:7):

உலகைப் படைத்தவருக்கு ஒரு தங்குமிடம் கூடக் கிடைக்காத நிலையில், மரியாள் ஒரு மாட்டுத் தொழுவத்தைத் தேர்ந்தெடுக்க வேண்டியிருந்தது. இது பழைய ஏற்பாட்டில் எரேமியா தீர்க்கதரிசி சொன்னது போல, "தேசத்தில் அந்நியனைப் போலவும், ஒரு ராத்திரி தங்குகிற வழிப்போக்கனைப் போலவும்" (எரேமியா 14:8) மேசியா வருவதைக் குறிக்கிறது.

(2).முன்னணையில் கிடத்தப்பட்ட மேசியா (லூக்கா 2:7):

மென்மையான படுக்கைகளுக்குப் பதில், மாடுகளுக்குத் தீவனம் வைக்கும் "முன்னணையில்" (Manger) தன் குழந்தையைக் கிடத்தினாள். பழைய ஏற்பாட்டில் ஏசாயா 1:3-ல் "எருது தன் எஜமானையும், கழுதை தன் ஆண்டவன் வைக்கும் முன்னணையையும் அறியும்" என்ற வசனத்தின் ஆவிக்குரிய நிறைவேற்றமாக இது அமைந்தது.

(3).வறுமையின் பலி (லேவிய 12:8):

முன்பே குறிப்பிட்டது போல, பணக்காரர்கள் ஆட்டுக்குட்டியைப் பலியிட வேண்டும். ஆனால் மரியாள் வறுமையின் அடையாளமான "மாடப்புறாக்களை" பலியிட்டாள். செல்வ செழிப்புள்ள தாவீது ராஜாவின் வம்சத்தில் பிறந்தும், அவள் மிக எளிய ஏழைப் பெண்ணாகவே வாழ்ந்தாள்.

(4).நாசரேத்தூர் - ஒரு சிறுமைப்படுத்தப்பட்ட ஊர் (யோவான் 1:46):

மரியாள் வாழ்ந்த நாசரேத்து ஊர் மிகவும் பிற்படுத்தப்பட்ட இடமாகக் கருதப்பட்டது. "நாசரேத்திலிருந்து நன்மையானது ஏதாகிலும் உண்டாகுமா?" என்ற ஏளனப் பேச்சை அவள் சந்திக்க நேர்ந்தது. இது "அவர் துச்சமாய் எண்ணப்பட்டார்" (ஏசாயா 53:3) என்ற தீர்க்கதரிசனத்தின் தொடக்கமாகும்.

(5).பழைய ஏற்பாட்டுத் தாழ்மையின் மாதிரி (லூக்கா 1:48):

மரியாள் தன் பாடலில், "தமது அடிமையின் தாழ்மையைக் கண்ணோக்கினார்" என்று பாடுகிறாள். இது பழைய ஏற்பாட்டில் அன்னாளின் பாடலை (1 சாமுவேல் 2) நினைவுபடுத்துகிறது. தேவன் உலகப் பிரகாரமான செல்வத்தை விட, உள்ளத்தின் எளிமையையே விரும்புகிறார் என்பதை மரியாள் ஏற்றுக்கொண்டாள்.

(6).சுயமாக உழைக்கும் வர்க்கம்:

தச்சனாகிய யோசேப்பின் மனைவியாக, அன்றாட உழைப்பில் வாழ்ந்த ஒரு எளிய குடும்பத் தலைவியாகவே அவள் இருந்தாள். பழைய ஏற்பாட்டில் நீதிமொழிகள் 31-ல் சொல்லப்பட்ட "குணவதி"யைப் போல, வறுமையிலும் தன் கைகளின் உழைப்பை நம்பி, தேவனுக்குப் பயந்து வாழ்ந்தாள்.

(7).மகிமையைத் துறந்த நிலை:

பரலோகத்தின் மகிமையைத் துறந்து பூமிக்கு வந்த இயேசுவுக்கு, ஒரு எளிய தாயாக இருந்து பணிவிடை செய்தாள். "ஐசுவரியமுள்ளவராயிருந்தும்... தம்முடைய தரித்திரத்தினாலே நீங்கள் ஐசுவரியவான்களாகும்படிக்கு, உங்கள்நிமித்தம் தரித்திரரானார்" 

(2 கொரி 8:9) என்ற வசனத்திற்கு மரியாள் ஒரு முக்கிய பங்காளியாக இருந்தாள்.

இந்த ஏழு குறிப்புகளும், மரியாள் "ஆண்டவருக்கு அடிமை" என்று சொன்னபோது, அவர் கொடுத்த சிலுவையையும், வறுமையையும், நிந்தையையும் எவ்வளவு மனமுவந்து ஏற்றுக்கொண்டார் என்பதை நமக்குத் தெளிவுபடுத்துகின்றன.

மரியாளின் இந்த அர்ப்பணிப்பிலிருந்து ஒவ்வொரு விசுவாசியும் கற்றுக்கொள்ள வேண்டிய மிக முக்கியமான சில ஆவிக்குரிய பாடங்கள்.

1).முழுமையான சரணாகதி (Total Surrender):

"நான் ஆண்டவருக்கு அடிமை" என்று சொன்னதன் மூலம், தன் விருப்பம், கௌரவம், பாதுகாப்பு ஆகியவற்றை விட தேவனுடைய சித்தமே மேலானது என்பதை மரியாள் காட்டினார். தேவன் நம்மிடம் எதைக் கேட்டாலும், "உம்முடைய வார்த்தையின்படி எனக்கு ஆகக்கடவது" என்று சொல்லும் மனநிலை நமக்கு வேண்டும்.

2).நிந்தையைச் சுமக்கத் துணிதல் (Bearing Reproach):

விசுவாசப் பாதையில் நடக்கும்போது சமூகம் நம்மைத் தவறாகப் புரிந்துகொள்ளலாம், அவதூறு பேசலாம். ஆனால், மனிதர்களின் அங்கீகாரத்தை விட தேவனுடைய அங்கீகாரமே முக்கியம் என்பதை மரியாளின் வாழ்க்கை நமக்குக் கற்பிக்கிறது.

3).வார்த்தையில் நம்பிக்கை (Faith in the Word):

இயற்கைக்கு அப்பாற்பட்ட காரியங்கள் நடக்கும் என்று தேவன் சொன்னபோது, அது எப்படிச் சாத்தியம் என்று சந்தேகப்படாமல், தேவனால் கூடாதது ஒன்றுமில்லை என்று நம்பினார். தெரியாத எதிர்காலத்தை, தெரிந்த தேவனிடம் ஒப்படைப்பதே உண்மையான விசுவாசம்.

4).தாழ்மையே உயர்வின் வழி (Humility as a Path to Glory):
தேவன் தன்னைத் தேர்ந்தெடுத்தபோது மரியாள் பெருமைப்படவில்லை; மாறாகத் தன்னை ஒரு "அடிமை" என்றே அடையாளப்படுத்தினார். "தாழ்மையுள்ளவர்களுக்குத் தேவன் கிருபை அளிக்கிறார்" (யாக்கோபு 4:6) என்ற சத்தியத்திற்கு மரியாள் ஒரு சிறந்த உதாரணம்.

5).துக்கத்திலும் நிலைத்திருத்தல் (Endurance in Suffering):
வாழ்க்கையில் "பட்டயம் உருவுவது" போன்ற வேதனையான நேரங்கள் வரும்போது, தேவனை விட்டு விலகிவிடாமல், சிலுவையின் அடியில் நின்ற மரியாளைப் போல நாமும் சோதனைகளில் நிலைத்திருக்க வேண்டும்.
6).நியாயப்பிரமாணத்திற்குக் கீழ்ப்படிதல் (Obedience to Principles):
தேவனால் விசேஷமாகத் தெரிந்தெடுக்கப்பட்டிருந்தாலும், மரியாள் ஒருபோதும் தன்னை விதிகளுக்கு அப்பாற்பட்டவராகக் கருதவில்லை. சபையின் ஒழுங்கு மற்றும் தேவனுடைய பிரமாணங்களுக்குக் கீழ்ப்படிவது ஒரு விசுவாசியின் கடமை.

7).தேவன் மேல் பொறுப்பை விடுதல் (Letting God Defend You):
விபச்சாரக் குற்றம் சாட்டப்பட வாய்ப்பிருந்தும் மரியாள் தன்னைத் தானாகத் தற்காத்துக் கொள்ள முயலவில்லை. மௌனமாக இருந்தார்; தேவனே யோசேப்பிடம் பேசி உண்மையை வெளிப்படுத்தினார். நம்மைப் பற்றிய உண்மைகள் தவறாகப் பேசப்படும்போது, நமக்காகப் போராட தேவனுக்கு இடம் கொடுக்க வேண்டும்.
மரியாளைப் போலவே நாமும் தேவனுடைய திட்டத்திற்கு ஒரு "கருவியாக" மாறத் தயாரா என்பதே நம் முன்னுள்ள கேள்வி.
சிந்திப்போம் ஒப்புக் கொடுப்போம் கர்த்தர் பெரிய காரியங்களை செய்வதாக ஆமென்.
கிறிஸ்துவின் பணியில்
சகோதரன் சிலுவை ராஜா.
9841711591.